"Berlin danışıqları: sülhə doğru addım, yoxsa uzanan proses?" - "The Telegraph"

"Qərb nikbin danışsa da, təhlükəsizlik zəmanətləri və ərazi məsələsi hələ də əsas maneədir..."

Berlində ABŞ, Ukrayna və Avropa liderləri arasında keçirilən danışıqlar müəyyən irəliləyiş yaratsa da, Rusiya-Ukrayna müharibəsinin yaxın zamanda başa çatacağı hələ real görünmür.

Moderator.az xəbər verir ki, bu barədə "The Telegraph" nəşri yazıb.

Qərb mediası vurğulayır ki, Tramp administrasiyasının nikbin bəyanatlarına baxmayaraq, proses hələlik "vasitəçi diplomatiyası" mərhələsindən kənara çıxmayıb.

Təhlükəsizlik zəmanətləri var, amma mexanizm hələ qeyri-müəyyəndir

Avropa liderləri Ukrayna üçün çoxmillətli qüvvələr, hüquqi təhlükəsizlik öhdəlikləri, atəşkəsə nəzarət mexanizmi və müharibədən sonrakı bərpa investisiyalarını əhatə edən zəmanətlər paketi təklif ediblər. ABŞ isə Kiyevə "platin səviyyəli" təhlükəsizlik zəmanətləri vəd etdiyini bildirsə də, bu zəmanətlərin konkret forması açıqlanmayıb və ABŞ qoşunlarının Ukraynaya göndərilməsi istisna olunur.

"The Washington Post" qeyd edir ki, Vaşinqton NATO-ya üzvlük riskini üzərinə götürmədən, ona bənzər zəmanət mexanizmi qurmağa çalışır. Lakin tərəflər hələlik danışıqlar yolu ilə sürətli kompromisə hazır görünmür.

Ərazi məsələsi əsas maneə olaraq qalır

Ən ciddi fikir ayrılığı Rusiya tərəfindən işğal olunmuş ərazilərin taleyi ilə bağlıdır. "Axios" yazır ki, ABŞ planında Ukraynanın Donbasın təxminən 14 faizindən geri çəkilməsi ehtimalı müzakirə olunur, lakin Kiyev bunu qəti şəkildə rədd edir və Donbasın nə de-yure, nə də de-fakto Rusiya kimi tanınmayacağını vurğulayır.

Polşanın baş naziri Donald Tusk ABŞ, Avropa və Ukraynanın eyni mövqedən çıxış etdiyini desə də, Milada qədər atəşkəsin əldə olunmasını az ehtimal hesab edir. "The Telegraph" isə xəbərdarlıq edir: Rusiya real güzəştlərə hazır olmadan, təhlükəsizlik zəmanətləri və ərazi məsələsi həll edilmədən müharibənin tezliklə bitəcəyini söyləmək hələ tezdir.