"Bolqarıstanda kütləvi etirazlar hökumətin istefası ilə nəticələnib" - BBC

"Etirazçıların əsas narazılığı hökumətin geniş yayılmış korrupsiyaya göz yumması ilə bağlı olub..."

Bolqarıstanın baş naziri Rosen Jelyazkov və onun sağ-mərkəzçi hökuməti genişmiqyaslı küçə aksiyalarının fonunda istefa verib.

Moderator.az xəbər verir ki, bu barədə "bbc.com" nəşri məlumat yayıb.

Kütləvi etirazlar hökuməti devirdi

Çərşənbə axşamı axşam saatlarında Sofiyanın mərkəzi - "Hakimiyyət üçbucağı" kimi tanınan Müstəqillik meydanı 50 mindən 100 minə qədər insanla dolub. Nümayişçilər parlament binasına "İstefa" və "Mafiya rədd olsun" sözlərini proyeksiya edib. Prezident Rumen Radev də ötən həftə etirazçıları açıq şəkildə dəstəkləyərək hökumətin istefasını tələb edib. Jelyazkov parlamentdə növbəti etimadsızlıq səsverməsindən əvvəl və ölkənin avrozona üzvlüyünə 20 gün qalmış postunu tərk edib

Korrupsiya ittihamları və siyasi böhran dərinləşir

Etirazçıların əsas narazılığı hökumətin geniş yayılmış korrupsiyaya göz yumması ilə bağlı olub. Suallarla qarşılanan gələnilki büdcə layihəsi də etirazların təzyiqi ilə geri çəkilib. Jelyazkov televiziyaya müraciətində "Vətəndaşların səsini eşidirik" deyərək hər iki nəsildən insanların dəyişiklik tələb etdiyini vurğulayıb.

Baş nazirin kabineti yanvardan bəri beş etimadsızlıq səsverməsindən sağ çıxıb və altıncı səsvermə məhz bu həftəyə planlaşdırılıb. Etirazlarda xüsusilə iki fiqur hədəf alınır: ABŞ və Böyük Britaniyanın sanksiyalarına məruz qalmış oliqarx Delyan Peyevski, 2020-ci ildə korrupsiya aksiyaları nəticəsində hakimiyyətdən gedən keçmiş baş nazir Boyko Borisov. Aksiyanın əsas şüarı "İstefa! Peuevski və Borisov, hakimiyyətdən rədd olun!" olub.

Avrozona kursu davam edir, lakin cəmiyyət dəyişiklik tələb edir

Borisovun GERB partiyası 2024-cü ilin oktyabr seçkilərində birinci olsa da, siyasi sabitlik əldə olunmayıb. Ölkədə son dörd ildə yeddi seçki keçirilib və hökumətlər bir-birinin ardınca dağılır. Bununla belə, ekspertlər Bolqarıstanın 1 yanvar tarixində avrozona üzvlüyünə daxil olmasının təhlükədə olmadığını bildirir.

İstefa açıqlamasında Jelyazkov ölkənin ciddi bir sınaq qarşısında qaldığını və bolqarların yeni hökumətin necə olmalı olduğu barədə "səmimi təkliflər" irəli sürməli olduğunu deyib. Bolqarıstan hazırda "Transparency International" indeksində korrupsiyanın yüksək olması səbəbilə Avropada ən aşağı sıralardan birində - Macarıstan və Rumıniyanın arasında qərarlaşıb.