"Tibb dünyasında tarixi dönüş: ümidsiz sayılan xəstələrdə tam sağalma baş verib" - "Daily Mail"

"Yeni üsul ölümcül xəstələrdə tam sağalma ümidi doğurub..."

Onkologiyada misilsiz irəliləyiş qeydə alınıb: həkimlər ilk dəfə olaraq çoxsaylı mieloma diaqnozu qoyulmuş, bütün müalicələrə müqavimət göstərən xəstələrin tam sağalması barədə xəbər verib.

Moderator.az xəbər verir ki, bu barədə "Daily Mail" nəşri yazıb.

Ölümcül xəstələrdə tam sağalma mümkün oldu

Nəşr yazır ki, bu, qan xərçənginin ən təhlükəli formalarından biri hesab edilən xəstəlikdir və uzun illər boyu "ölüm hökmü" kimi qəbul olunub. Tədqiqatın nəticələri xüsusilə diqqət çəkir: 97 ağır xəstədən ibarət qrupda aparılan yeni immunoterapiya beş il sonra 82 nəfərin sağ qalmasını və xəstəlik izlərinin tamamən yox olmasını təmin edib. Həkimlər ilk dəfə "sağalma" sözünü ehtiyatla olsa da, klinik olaraq işlətməyə başlayıb.

"Canlı dərmanlar": CAR T-terapiya necə işləyir?

Uğurun əsasını təşkil edən metod CAR T-köklü immunoterapiyadır. Proses belə aparılır: xəstədən T-hüceyrələri götürülür, laboratoriyada genetik şəkildə dəyişdirilərək mieloma hüceyrələrini tanıyıb məhv etməyə "öyrədilir", milyonlarla "yenilənmiş" hüceyrə bədənə geri qaytarılır, bu hüceyrələr qan dövranında patrul apararaq şişi harada olsa tapıb məhv edir.

Əvvəllər mieloma ilə mübarizədə əsas çətinlik şişin dərinlikdə - sümük iliyində gizlənməsi olub. Bu isə həm sümüklərin içdən çökməsinə, həm də böyrək çatışmazlığına səbəb olurdu. Yeni texnologiya məhz bu səbəbdən "misilsiz" adlandırılıb. Britaniyalı mütəxəssis Qrem Cekson bunu "mieloma üçün indiyədək görülmüş ən effektiv müalicə" adlandırıb

Müalicənin dəyəri və gələcək perspektivlər

Metodın möcüzəvi nəticələri olsa da, onun tətbiqi hələlik məhduddur. CAR T-terapiya yüksək temperatur və güclü iltihabla müşayiət olunan sitokin buraxılması sindromu yarada bilər və ciddi tibbi nəzarət tələb edir. Bundan əlavə, müalicə çox bahadır: bir infuziya təxminən 350 min funt sterlinqə başa gəlir. Bu səbəbdən bir çox ölkələrin dövlət xəstəxanalarında hələ geniş tətbiq olunmur. Lakin uğurlu nəticələr texnologiyanın daha sürətli yayılmasına təkan verə bilər.