"Makron Pekini Ukrayna enerji infrastrukturuna zərbələr üçün moratoriuma dəstəyə çağırıb" - "Reuters"

"Fransa və Çin liderləri Ukrayna müharibəsinin dayandırılması və beynəlxalq sabitlik barədə danışıb..."

Fransa prezidenti Emmanuel Makron Çin lideri Si Tszinpin ilə görüşündə Rusiyanın Ukraynanın enerji infrastrukturu obyektlərinə zərbələrinə qarşı qış mövsümü ərzində moratoriumun tətbiqini dəstəkləməyə çağırıb.

Moderator.az xəbər verir ki, bu barədə "Reuters" agentliyi məlumat yayıb.

Liderlər Ukraynadakı vəziyyəti müzakirə edib

Makron mətbuat konfransında bildirib ki, "Biz qısa müddətdə enerji obyektlərinə zərbələr üzrə moratoriumu təmin etmək üçün səyləri birləşdirməliyik". O, ümid edir ki, Si Tsinpin bu təşəbbüsə qoşularaq Avropa ilə birgə sabitliyi qorumaq və beynəlxalq hüququ təmin etmək istiqamətində addımlar atacaq. "Rusiya-Ukrayna müharibəsi Avropanın təhlükəsizliyinə ciddi təhdid yaradır. Biz Pekini Moskva üzərində təsirindən istifadə edərək Ukraynada dayanıqlı sülhün əldə olunmasına yardım etməyə çağırırıq", - Makron əlavə edib.

Çin tərəfi dialoq və sülhə sadiqdir

Si Tszinpin vurğulayıb ki, Çin Ukraynada müharibənin sona çatmasına yönəlmiş bütün səyləri dəstəkləyir. "Çin münaqişənin bütün tərəflərinin dialoq və danışıqlar yolu ilə ədalətli, uzunmüddətli və icra edilə bilən sülh sazişinə nail olmasını istəyir", - o, qeyd edib. Eyni zamanda, Çin gələcəkdə də "böhranın" siyasi həllində konstruktiv rol oynayacaq, lakin "Çini günahlandırmaq və ləkələmək cəhdlərinə" qarşı qəti mövqe saxlayacaq. Burada Ukrayna tərəfdarlarının Rusiyaya iqtisadi dəstək göstərməsi nəzərdə tutulur.

Geosiyasi və ticarət əlaqələri

"Reuters"-in məlumatına görə, Makron Çinlə geosiyasi, ticarət və ətraf mühit sahələrində daha sıx əməkdaşlığa çağırıb. Avropa İttifaqı Pekindən Ukraynadakı müharibənin dayandırılmasında yardım istəyir, eyni zamanda Çin ABŞ-ın tarif siyasəti fonunda diplomatik üstünlüklər əldə etmək niyyətindədir. Makron dördüncü dəfə Çin səfərini həyata keçirərək xarici siyasətdə mövqelərini möhkəmləndirmək və fransız sənayesi üçün kommersiya müqavilələri təmin etmək, son illərində siyasi irsini canlandırmaq niyyətindədir.

Çin isə 27 Avropa İttifaqı ölkəsi ilə ticarət mübahisələrini yumşaltmaq və ABŞ üçün alternativ bazar kimi öz mövqeyini gücləndirmək niyyətindədir. Makron Pekində çıxışında bildirib: "İndi heç vaxt olmadığı qədər Çin və Fransa arasında dialoq həyati əhəmiyyət daşıyır. Biz sülh və sabirlik naminə birləşməliyik". Si Tszinpin isə əlavə edib: "Xarici mühit necə dəyişsə də, ölkələrimiz həmişə müstəqillik və böyük dövlətlərin strateji baxışını nümayiş etdirməlidir". O, Çin tərəfindən Ukrayna və Qəzza bölgəsində sülhün təmin olunmasına sadiqlik ifadə edib.