"Trampın Venesuelaya hərbi müdaxiləyə hazırlaşır?" - "Detaly" (İsrail)

"Trampın gerçək məqsədi ölkənin böyük neft ehtiyatlarını ABŞ-ın təsir dairəsinə qaytarmaqdır..."

Dekabrın 1-də ABŞ prezidenti Donal Tramp milli təhlükəsizlik qrupu ilə Venesuela üzrə "növbəti addımlar"ı müzakirə etmək üçün görüş keçirib.

Moderator.az xəbər verir ki, bu barədə "detaly.co" nəşri yazıb.

ABŞ-ın hərbi hazırlıqları və Trampın planları

Müəllif yazır ki, bu, ABŞ-ın Karib dənizindəki hərbi mövcudluğunu artırdığı bir vaxtda baş verib və Venesuela prezidenti Nikolas Maduro hökumətinin devrilməsinə yönəlmiş mümkün yerüstü müdaxilə qorxularını artırıb.

"Reuters" agentliyinin məlumatına görə, Oval ofisdə müdafiə naziri Pit Heqset, Birləşmiş Baş Qərargahlar Komitəsinin sədri general Den Keyn, Dövlət katibi Marko Rubio və digər yüksək vəzifəli şəxslər iştirak edib. Görüşün detalları hələ açıqlanmayıb.

Tramp əvvəlki həftələrdə bildirib ki, Venesueladakı cinayətkar qruplara qarşı yerüstü əməliyyatlar "çox yaxın zamanda" başlaya bilər. Bu, ABŞ hərbçilərinin Karib dənizində Venesuelalı narkotik ticarətçilərə qarşı apardığı çoxaylı əməliyyatların eskalasiyası deməkdir.

Hava məkanı və hərbi təzyiqlər

Tramp "Truth Social" hesabında Venesuela üzərində hava məkanının "tamamilə bağlanmalı" olduğunu bəyan edib. Bəzi müşahidəçilər bunu hərbi hazırlıq kimi qiymətləndirib. Lakin Tramp jurnalistlərə bu addımı "yanlış yozmamağı" tövsiyə edib.

Vaşinqtondakı müşahidəçilər bunu Maduro hökumətini ölkəni tərk etməyə məcbur etmək cəhdi kimi şərh edirlər. "Reuters" bildirir ki, Tramp Maduroya ölkəni tərk etməsi üçün bir həftə vaxt verib, Maduro bunu etmədikdən sonra ABŞ prezidenti hava məkanının "bağlanması" barədə açıqlama verib.

ABŞ-ın motivləri və beynəlxalq hüquq məsələləri

Tramp administrasiyası bunu Venesueladan narkotik trafiki ilə mübarizə kimi izah edir. ABŞ əvvəllər Karib dənizində "Venesuela narkotikçilərinə" qarşı ölümcül zərbələr endirib. Lakin ABŞ daxilində bu əməliyyatları dəstəkləməyənlər də var. Respublikaçı və demokrat liderlər silahlı qüvvələr komitələrində ABŞ hərbi əməliyyatlarını daha ciddi nəzarət altına almağa çağırıblar.

Hərbi hüquq ekspertləri bildirir ki, ABŞ-ın gəmi heyətinə "hamını məhv et" əmri verməsi beynəlxalq hüquq baxımından ciddi qanunsuzluq yaradır. Keçmiş hərbi hüquqşünaslar bunu "hərbi cinayət və ya qətl" kimi dəyərləndirir, hüquq müdafiəçiləri isə belə əməliyyatları "hakimiyyətsiz edam" adlandırır. Ekspertlər hesab edir ki, Trampın Venesuela siyasəti əsasən narkotiklərlə bağlı deyil, ölkənin böyük neft ehtiyatlarını ABŞ-ın təsir dairəsinə qaytarmaq məqsədini daşıyır.

Venesuelanın reaksiyası

Karakas Trampın hava məkanını "bağlamaq" açıqlamasını pisləyib və bunu "sui-qəsd və qanunsuz təcavüz" adlandırıb. Maduro isə televiziya çıxışlarında sülh çağırışı edib: "Müharibəyə yox əbədi sülhə-hə deyirik".

Müəllif: Aleksandra Appelberq