Orban: Putinlə görüşdə böyük sövdələşmələr müzakirə olunub

Noyabrın 28-də Moskvada Rusiya prezidenti Vladimir Putinlə görüş zamanı iki ölkənin şirkətləri arasında bir sıra iri müqavilələrin bağlanması imkanları müzakirə olunub.

Moderator.az xəbər verir ki, bunu Macarıstanın baş naziri Viktor Orban bildirib.

"Biz iki və ya üç böyük sövdələşmənin qapısını açmışıq və indi neft şirkəti MOL-un nümayəndələri bu barədə danışıqlar aparacaqlar. Bu, biznes məsələsi olacaq", - o bildirib.

Orban qeyd edib ki, Rusiyaya səfərinin əsas məqsədi enerji təchizatını müzakirə etmək olub. O vurğulayıb ki, Macarıstan neftinin böyük hissəsini hələ də Rusiyadan “Drujba” kəməri ilə, qazı isə “Türk axını” ilə alır.

Orban həmçinin bəyan edib ki, o, Rusiya prezidenti Vladimir Putindən neft və qaz tədarükünün davamı üçün zəmanət alıb .

Noyabrın 28-də Orban Putinlə danışıqlar aparmaq üçün Moskvaya gəlib. Görüşün əsas məqsədi Rusiyanın Macarıstana enerji təchizatı və Ukrayna münaqişəsini müzakirə etmək olub.