"Putinin məqsədi Ukraynanı yenidən Moskvanın orbitinə qaytarmaqdır" - "The Wall Street Journal"

"Tramp Ukraynanın mövcud vəziyyətinin ABŞ-ın siyasətinə mane olmasına qoymayacaq..."

ABŞ-ın irəli sürdüyü "sülh planı" ətrafında diplomatiya yeni mərhələyə keçir.

Moderator.az xəbər verir ki, bu barədə "The Wall Street Journal" nəşri yazıb.

Planın mahiyyəti Ukraynanın NATO perspektivini məhdudlaşdırmaq, Donbasın nəzarətdən çıxmasını qəbul etdirmək və ordunun, HHQ-nin gücünə məhdudiyyətlər qoymaqdır. Ekspertlər xəbərdarlıq edir: bu sənəd yalnız müvəqqəti pauza yarada və yeni qarşıdurmanın zəmininə çevrilə bilər.

Moskvanın tələbi daha genişdir

Nəşr yazır ki, Putinin reaksiyası Kreml üçün təkcə Donbasın yetərli olmadığını göstərir. O, döyüşlərin yalnız "Ukrayna işğal olunmuş bütün ərazilərdən çıxacağı halda" bitəcəyini bildirib. Bu isə Ukraynanın suverenliyini məhdudlaşdıran daha geniş siyasi dəyişikliklərin tələb olunduğunu göstərir.

Ekspertlərə görə, Putinin məqsədi Ukraynanı NATO-dan uzaqlaşdırmaq və uzunmüddətli perspektivdə Moskvanın təsir zonasına qaytarmaqdır. Rusiyalı iqtisadçı Konstantin Sonin bunu belə ifadə edir: "Bu müharibə Rusiyanın yaratmaq istədiyi yeni nizamın tərkib hissəsidir".

"Ukrayna çətin seçim qarşısındadır"

"Financial Times" nəşri yazır ki, Kiyev siyasi və hərbi olaraq çıxılmaz vəziyyətdədir: planı qəbul etmək strateji məğlubiyyət, rədd etmək isə daha uzun və ağır müharibə deməkdir. Rusiya resurs üstünlüyü qazandıqca 2026-cı ilə doğru daha genişmiqyaslı hücumların mümkünlüyü artır və bu halda danışıqlar masasında şərtlər daha da pisləşə bilər. Ekspertlər deyir: zəif mövqedən bağlanan sülh sazişi etibarlı deyil və əgər Qərb real təhlükəsizlik təminatı verməsə, Rusiya uyğun anda yenidən hücuma keçə bilər.

Ukrayna nümayəndələri ABŞ-da

"Bloomberg" nəşri yazır ki, Ukraynanın yüksək səviyyəli nümayəndə heyəti artıq ABŞ-dadır və Trampın emissarları Stiv Uitkoff və Cared Kuşnerlə danışıqlar aparacaq. Ehtimal olunur ki, prosesə Ukrayna kəşfiyyatının rəhbəri Kirill Budanov başçılıq edəcək. Bu, Kiyevin ilk dəfə yeni administrasiya ilə rəsmi şəkildə planı müzakirə etməsidir.

Jurnalist Oliver Kerrol qeyd edir: "Danışıqlar artıq başlayıb və Tramp Ukraynanın mövcud vəziyyətinin ABŞ siyasətini ləngitməsinə imkan verməyəcək”. Müharibə diplomatik mərhələyə daxil olub, lakin nəticə hələ aydın deyil. Analitiklər bildirir: Ukraynanın qarşısında iki yol var - indi kompromisə getmək və ya müharibəni davam etdirib eyni kompromisi daha ağır şərtlərlə qəbul etmək. Qərbin güclü zəmanəti olmadan hər iki variant risklidir.