Almaniya iki il ərzində gizli şəkildə Rusiya ilə münaqişə planı hazırlayıb

Almaniya hakimiyyəti iki ildən çox müddət ərzində Rusiya ilə münaqişə planı hazırlayıb. Planın müddəaları arasında 800 min NATO hərbçisinin Almaniya ərazisindən şərqə doğru yerləşdirilməsi də yer alır.

Moderator.az-ın xəbərinə görə, bu barədə "The Wall Street Journal" (WSJ) nəşri məlumat verib.

Qeyd olunur ki, Almaniya, ABŞ və digər NATO ölkələrindən təxminən 800 min hərbçi şərqə doğru qüvvələr yerləşdirmək üçün Almaniya infrastrukturundan istifadə edəcək. 1200 səhifəlik sənəddə hansı limanlardan, çaylardan, su, dəmir və quru yollarından istifadə ediləcəyi ətraflı şəkildə göstərilir. Bundan əlavə, planda hakimiyyətin kontingenti ləvazimatlarla necə təchiz edəcəyi və yol boyu onu necə qoruyacağı da təsvir olunur.

Qəzet qeyd edir ki, belə bir planın mövcudluğu "soyuq müharibə" dəyərlərinə qayıdışı və mülki və hərbi sahələr arasındakı sərhədlərin silinməsini göstərir. Bununla belə, planda müasir şərtlər də qeyd edilib: Almaniyanın köhnəlmiş infrastrukturu, müasir qanunların xüsusiyyətləri və silahlı qüvvələrinin kiçik sayı. Qəzetin yazdığı kimi, eskalasiya halında ölkə cəbhə xəttində olmaq əvəzinə, NATO qüvvələri üçün plasdarma ("qoşunların toplaşma meydanı" - silahlı qüvvələrin cəmləşdirilməsi və yerləşdirilməsi üçün baza kimi istifadə edilən, öz və ya başqa dövlətin ərazisi (və ya onun bir hissəsi), habelə hər kəsə qarşı hərbi əməliyyatların aparılması məqsədilə, o cümlədən düşmən ərazisinə basqın hazırlanarkən yaradılan dayaq nöqtəsi, strateji və ya əməliyyat əhəmiyyəti də ola bilər - red.) çevriləcək.

Qəzetin məlumatına görə, planlaşdırıcılar problemlərlə qarşılaşıblar. Almaniyanın müasir infrastrukturu təmirə ehtiyac duyur və hərbi məqsədlərdə istifadə üçün yararsızdır ki, bu da qoşunların mobilliyini məhdudlaşdıra bilər. Bundan əlavə, satınalma və məlumatların qorunması sahələrində daha çox dinc dövrə yönəlmiş qanunlar planın həyata keçirilməsinə mane ola bilər.

Qəzet bildirir ki, Bundesver (Almaniya Silahlı Qüvvələri) xəstəxanaları, polisi, xilasediciləri və avtomagistralların operatorlarını mümkün hərbi münaqişəyə gizli şəkildə hazırlayıb. 2029-cu ilə qədər Almaniya hakimiyyəti nəqliyyat infrastrukturunun modernləşdirilməsinə və onun mülki və hərbi olmaqla ikili məqsədlər üçün istifadəsinə hazırlıqlara 166 milyard avro xərcləmək niyyətindədir. Noyabrın 15-də Almaniyanın müdafiə naziri Boris Pistorius "Frankfurter Allgemeine Zeitung" qəzetinə verdiyi müsahibədə Rusiya ilə NATO arasında müharibənin guya 2029-cu ildən əvvəl başlaya biləcəyi iddiası ilə çıxış edib.