"50 yaşdan sonra həyatınızı uzada biləcək vərdişlər" - Dietoloqlar məsləhət görür

"Zülal, təbii qidalar, aktivlik və keyfiyyətli yuxu ömrü uzadır..."

Mütəxəssislər hesab edir ki, gündəlik həyat tərzində bir neçə sadə dəyişiklik sizin ömrünüzü təxminən 10 il uzada bilər. Həkimlər və dietoloqlar aktiv və sağlam yaşlanmaq üçün əsas qaydaları siyahıya alıb.

Moderator.az xəbər verir ki, bu barədə "Eat This, Not That!" saytı yazıb.

Hər yeməkdə zülal olmalıdır

Yaş artdıqca əzələlər tədricən həcm itirir, buna sarkopeniya deyilir. Bu proses maddələr mübadiləsinin yavaşlamasına, hərəkət qabiliyyətinin azalmasına və osteoporoz riskinin artmasına səbəb olur. Buna görə də qidalanmada keyfiyyətli zülal müntəzəm olmalıdır.

Dietoloq Eymi Şapiro 50 yaşdan yuxarı şəxslərə hər yeməkdə 25-30 qram heyvan mənşəli zülal tövsiyə edir. Bu, əzələ gücünü, metabolizmi və hərəkət qabiliyyətini qorumağa kömək edir. Ən yaxşı mənbələr: yağsız mal əti, hind quşu, toyuq, balıq və dəniz məhsulları.

Emal olunmuş məhsulları minimuma endirin

Fastfood və ultra emal olunmuş məhsullar tez-tez süni rəngləyicilər, aromatizatorlar, konservantlar və dad artırıcılar ehtiva edir. Onların müntəzəm qəbulu piylənmə, 2-ci tip diabet, ürək-damar problemləri və sürətli yaşlanma ilə bağlıdır. Optimal pəhrizdə təzə tərəvəz, paxlalılar, meyvələr, tam taxıllar, qoz-fındıq, faydalı yağlar və balıq olmalıdır.

Beyin və ürək üçün omeqa-3

Omeqa-3 yağ turşuları iltihabı azaldır, damarları qoruyur və kognitiv funksiyalara müsbət təsir göstərir. Dietoloq Steysi Qulbin deyir ki, böyüklər gündə ən az 1000 mq omeqa-3 qəbul etməlidir. Əsas mənbələr: somon, skumbriya, sardina. Vegetarianlar üçün isə çia və kətan toxumu, həmçinin qoz uyğundur.

Özünüz bişirin

Ev yeməkləri tərkibi nəzarət altında saxlamağa, duz və şəkər miqdarını azaltmağa, porsiyaları izləməyə imkan verir. Bu yalnız sağlam deyil, həm də beyin fəaliyyətini dəstəkləyir, gündəlik ritual yaradır və sosial əlaqələri gücləndirir.

"Göuqurşağı"yeyin

Hər rəngli tərəvəz və meyvə unikal antioksidantlar və fitonutrientlər ehtiva edir. Qırmızı pomidor, narıncı yerkökü, yaşıl brokoli, bənövşəyi kələm - bütün bunlar orqanizmi qoruyur, iltihabı azaldır, immuniteti gücləndirir və diabet, xərçəng, ürək-damar xəstəlikləri riskini aşağı salır.

Gündə ən az 30 dəqiqə aktiv olun

Hətta sürətli gediş və ya pilləkənlə qalxmaq belə ürək və beyin üçün faydalıdır. Həftədə iki dəfə güc məşqləri sümükləri və əzələləri möhkəmləndirir, hərəkət qabiliyyətini uzun illər qoruyur.

Qida əlavələrini nəzərdən keçirin

Yaş artdıqca B12 və D vitaminlərinin mənimsənilməsi azalır, bəzi dərmanlar isə bu səviyyəni daha da azaldır. Əlavələr qəbul etməzdən əvvəl analiz vermək və dozanı həkimlə müzakirə etmək vacibdir.

Keyfiyyətli yuxu

Dietoloq Eymi Deyvis xatırladır ki, hər gecə 6-8 saat yuxu sağlamlığın açarıdır. Yuxu əhval-ruhiyyəyə, immunitetə, kognitiv funksiyalara təsir edir və piylənmə, 2-ci tip diabet və demensiyanın riskini azaldır.