"Rusiya uzunmüddətli təhlükə olaraq qalacaq" - NATO baş katibi

"Əraziləri güzəştə getmək diktatorlara yaşıl işıq yandırmaqdır..."

NATO, ABŞ və Avropa paytaxtlarında Ukrayna ilə bağlı diplomatik fəallıq yeni mərhələyə daxil olub. NATO baş katibi Mark Rütte bildirib ki, müharibə 2025-ci ilin sonunadək başa çata bilər, lakin hətta atəşkəs razılaşması imzalansa belə, "Rusiya uzunmüddətli təhlükə olaraq qalacaq".

Moderator.az xəbər verir ki, bu barədə "elpais.com" nəşri yazıb.

Rütte müharibənin dayandırılması ilə bağlı təşəbbüsləri ABŞ prezidenti Donald Trampın səyləri ilə əlaqələndirib və onun planını "danışıqlar üçün baza" adlandırıb. Onun sözlərinə görə, hazırda ABŞ və Ukrayna sənəd üzərində paralel işləyir və prosesin tezliklə intensifləşəcəyi gözlənilir. O, həmçinin qeyd edib ki, artıq bir milyonadək rusiyalı həlak olub və Moskva böyük itkilərə baxmayaraq, cəmi bir neçə metr irəliləyə bilir.

Silah tədarükü və siyasi mövqelər

Rütte bildirib ki, Ukrayna ilin sonuna qədər müttəfiqlərdən PURL proqramı çərçivəsində təxminən 5 milyard dollar həcmində silah ala bilər. Bu mexanizm Ukraynaya ABŞ silahlarını Avropa və Kanada tərəfindən maliyyələşdirməklə daha sürətli əldə etməyə imkan verir. Onun sözlərinə görə, Avropa anbarları tükənsə də, tədarük hələlik davam etdirilə bilir.

Bu arada, Almaniya kansleri Fridrix Mers bəyan edib ki, Ukrayna olmadan istənilən saziş "dayanıqlı sülhün əsası ola bilməz". Berlin 2026-cı il büdcəsində Kiyevə ayrılan yardımın 11,5 milyard avroya çatdırılacağını açıqlayıb.

Vaşinqtonda isə informasiyaların ətrafında mübahisələr gedir. ABŞ Dövlət katibi Marko Rubio "NBC News"-ın Ukraynaya "məğlubiyyətin qaçılmaz olduğu" barədə xəbərini feyk adlandırıb və administrasiyada fikir ayrılığı olduğu barədə iddiaları təkzib edib.

Ukrayna cəmiyyətinin reaksiyası

"The Wall Street Journal" qeyd edir ki, Ukraynada cəmiyyətin əhvalı ziddiyyətlidir: əksəriyyət güzəştlərə qarşıdır, lakin yorğunluq da artıb. Sorğular göstərir ki, ukraynalıların 54 faizi, hətta bu, müharibənin uzanması bahasına olsa belə, ərazi güzəştlərinin əleyhinədir. Jurnalın danışdığı ukraynalılar iki əsas hiss arasında bölünüb.

Bəziləri qətiyyətli mövqedədir: "Ərazini vermək diktatorlara yaşıl işıq yandırmaqdır", -  kievli Herman Xiso bildirib. Digərləri isə, resursların tükəndiyi fonunda "pis, amma müharibəni dayandıran sülh" ideyasına daha açıqdır. Bununla belə, çoxları Avropaya ümid edir: "Əgər amerikalılar çəkinirsə, Avropa dayanacaq. Onlar yaxşı bilir ki, bu müharibə yalnız Ukraynaya aid deyil".

Yeni diplomatik mərhələ nikbinlik və qeyri-müəyyənliyin qarışığıdır. Rütte müharibənin 2025-ci ilin sonunadək bitə biləcəyini desə də, proses hazırda danışıqlar, təzyiq və silah tədarükü üçbucağında davam edir. Ukrayna cəmiyyəti isə hələlik bir mövqedə dəyişməzdir: "Sülhə tərəfdarıq, amma təslim olmaq bahasına yox".