"Cenevrə danışıqları: Trampın planı dəyişə bilər" - "Azadlıq Radiosu"

"Sülh təşəbbüsü kompromis deyil, geosiyasi diktə kimi təqdim olunur..."

Cenevrədə ABŞ, Ukrayna və Avropa nümayəndə heyətləri arasında davam edən danışıqlarda müəyyən dönüş hiss olunur.

Moderator.az xəbər verir ki, bu barədə "svoboda.org" nəşri məlumat yayıb.

Ukraynanın mövqeyi eşidilir

Prezident Vladimir Zelenski bildirib ki, artıq "Tramp komandasının Ukraynanın mövqeyini eşitdiyi barədə siqnallar var". Onun sözlərinə görə, görüşlər gecə saatlarınadək davam edib və danışıqlar bir neçə mühüm aspekt üzrə irəliləyib.

Zelenski vurğulayıb ki, əsas prioritet "dayanıqlı sülh, təhlükəsizlik təminatı və Ukraynanın ərazi bütövlüyünə hörmət"dir. O, həmçinin əsirlərin "hamının hamıya" formulu ilə dəyişdirilməsi və Rusiyanın qaçırdığı mülki şəxslərin qaytarılması məsələsinin də gündəmdə olduğunu təsdiqləyib.

Plan yenilənəcək

ABŞ Dövlət katibi Marko Rubio görüşləri "indiyə qədər ən məhsuldar mərhələ" kimi qiymətləndirib və qeyd edib ki, Trampın sülh planı üzərində müəyyən dəyişikliklər artıq nəzərdən keçirilir. Onun sözlərinə görə, tərəflər bəzi bəndləri "bənd-bənd" müzakirə edib və ideyalar arasında yaxınlaşma var.

Rubio həmçinin bildirib ki, Trampın əvvəllər elan etdiyi "son müddət" elastikdir, lakin Vaşinqton prosesi sürətləndirməyə çalışır. Danışıqların yekun sənəd forması həm ABŞ prezidenti Donald Tramp, həm də Rusiyanın rəsmi mövqeyi nəzərə alındıqdan sonra formalaşacaq.

Növbəti addım - Vaşinqton?

"Reuters" yazır ki, yaxın günlərdə Zelenskinin ABŞ-a səfəri mümkündür. Məqsəd danışıqların ən həssas hissələrini, xüsusilə də ərazi məsələlərini birbaşa Trampla müzakirə etməkdir. Eyni zamanda NATO-nun rolu, təhlükəsizlik təminatlarının mexanizmi və planın hüquqi təsdiqlənməsi də açıq qalan mövzular sırasında qalır.

Hazırda həm ABŞ, həm də Ukrayna nümayəndələri prosesi "konstruktiv və real nəticəyə yaxın" kimi təsvir etsə də, Zelenski açıq şəkildə xəbərdarlıq edir: "Əgər dünya Putinin güc yolu ilə sərhədləri dəyişməsinə göz yumsa, bu yalnız Ukrayna üçün yox, bütün qlobal nizam üçün təhlükəli presedent olacaq".

Danışıqlar hələ yekunlaşmayıb, lakin ilk dəfədir ki, tərəflər ehtiyatlı nikbinlik nümayiş etdirir. İndi əsas sual budur: bu nikbinlik siyasi sənədə çevriləcəkmi, yoxsa növbəti raundda yenidən qırılacaq?