"Time" jurnalında sürpriz namizəd: "İlin adamı" süni intellekt ola bilər" - Rusiya KİV-ləri

"Jurnal ilk dəfə canlı insan deyil, texnologiyanı mükafatlandıra bilər - siyahıda Tramp, Altman, Zelenski və Teylor Svift də var..."

"Time" jurnalının ənənəvi olaraq dekabrda elan etdiyi "İlin adamı" titulunun bu dəfə ilk dəfə insana deyil, texnologiyaya verilməsi mümkündür.

Moderator.az xəbər verir ki, bu barədə "fontanka.ru" nəşri məlumat yayıb.

Bukmeker proqnozları və sensasiyalı lider

"Polimarket" bukmeker platformasının proqnozlarına görə, hazırda ən real namizəd süni intellektdir (AI) - onun seçilmə ehtimalı 39 faiz olaraq qiymətləndirilir və göstərilər artır. Bu yanaşma təkcə statistik meyl deyil, 2025-ci ildə süni intellekt həm qlobal siyasəti, həm də iqtisadiyyatı formalaşdıracaq əsas texnoloji qüvvə kimi müzakirə olunur.

Süni intellekt tənzimləmələri Avropa Birliyində rəqəmsal qanunvericiliyi dəyişib, ABŞ-da seçki kampaniyaları feyk-kontentlə mübarizəni gündəmə gətirib, hərbi sahədə isə bu texnologiya artıq real əməliyyatlara inteqrasiya olunur. Nəticədə redaksiya qarşısında maraqlı sual yaranır: Texnologiyanı "insan kimi" mükafatlandırmaq olarmı?

Qalan namizədlər: siyasətçilər, texnologiya simaları və pop-mədəniyyət

Süni intellektdən sonra siyahının ikinci pilləsində NVIDIA-nın qurucusu və CEO-su Censen Xuandur - onun ehtimalı 17 faiz qiymətləndirilir. AI bumunun arxasındakı ən mühüm fiqurlardan sayılan Xuan GPU-ların qlobal çatışmazlığının, investisiya rekordlarının və texnoloji rəqabətin rəmzinə çevrilib.

Reytinqdə daha sonra belə adlar gəlir: Papa XIV Leo (14%), OpenAI rəhbəri Sem Altman    (8%); ABŞ prezidenti Donald Tramp    (7%),
Nyu-York meri Zoxran Mamdani    (4%), İsrail baş naziri Benyamin Netanyahu     (3%), İlon Mask, Vladimir Zelenski, Ceyrom Pauell, Teylor Svift    (3%-dən az).

Donald Tramp sonuncu dəfə bu titula 2024-cü ildə layiq görülmüşdü və 2025-ci ildə ABŞ siyasi gündəminə təsiri davam etdiyindən yenidən final namizədlərindən biridir. Zelenski isə Ukraynada savaşın uzunmüddətli nəticələri səbəbindən siyahıda qalıb, amma maraq kəskin azalıb.

Teylor Svift isə pop mədəniyyətində nadir görünən davamlı qlobal təsirinə görə siyahıda saxlanılıb - onun 2024-2025-ci illərdə iqtisadiyyata təsiri hətta ayrıca "Swiftonomics" termininə çevrilib.

Tarix, meyarlar və mümkün presedent

"Time" jurnalı bu titulu 1927-ci ildən etibarən təqdim edir və meyarlar çox sadədir: "İlin adamı" həmin il dünyaya istər müsbət, istərsə mənfi mənada ən böyük təsir göstərən şəxsdir. Keçmiş laureatlardan bəziləri bunlardır: Franklin Ruzvelt - 3 dəfə, Adolf Hitler, İosif Stalin, Con F. Kennedi, Corc Buş,  "Amerika əsgəri" (kollektiv nominasiya), "internet istifadəçisi". Bu fakt göstərir ki, mükafat qəhrəmanlıq və ya populyarlıq deyil, təsirin miqyası ilə bağlıdır. İlk qalib Çarlz Lindberq olub - o, Atlantik okeanını fasiləsiz uçuşla keçən ilk pilot idi və texnoloji irəliləyişin rəmzinə çevrilmişdi.

Bu il nə baş verə bilər?

Əgər süni intellekt qalib seçilərsə, jurnal ciddi vizual dilemmanın qarşısında qalacaq: kimin şəkli üz qabığında görünməlidir? Çip, robot, kod sətri, yoxsa heç nə - sadəcə konseptual qrafika? Redaksiyada bu məsələ müzakirə mövzusu olaraq qalır, amma artıq aydın olan budur: 2025-ci ilin dünyasına ən çox təsir edən "fiqur" canlı deyil, alqoritmdir. Jurnalın qərarı dekabrın əvvəlində elan ediləcək və hələlik yalnız bir şey dəqiqdir: Bu ilki seçim rəmzi olmaqla yanaşı, tarixdə dönüş nöqtəsi kimi qalacaq.