"Ağ Evdən "zərbə paketi": ABŞ-ın yeni sanksiyaları və gizli diplomatiya" - CNN

"Vaşinqton Rusiyaya qarşı rekord sərt sanksiyalar hazırlayır, eyni zamanda Kreml nümayəndələri ilə Ukrayna barədə gizli danışıqlar aparır..."

ABŞ Senatı Rusiyaya qarşı yeni və "sarsıdıcı" sanksiya paketini səsverməyə çıxarmağa hazırlaşır. 

Moderator.az xəbər verir ki, bu barədə CNN telekanalı məlumat yayıb.

Yeni sanksiyalar Senatda sürət qazanır

Layihənin müəllifi senator Lindsi Qrem bildirib ki, Ağ Ev sənədi artıq rəsmi şəkildə dəstəkləyib. Onun sözlərinə görə, prezident Donald Tramp şəxsən Senatın çoxluq lideri Con Tünə qanun layihəsini irəli aparmağı tapşırıb: "Bazar günü qolf oynayanda prezident Tramp deyib: "Layihəni təqdim edin".

Hazırda layihə 80-dən çox senatorun dəstəyini alıb. Sənəd Rusiya qazı, nefti və uranını alan ölkələrə qarşı ikinci dərəcəli sanksiyalar və yüksək tariflər tətbiq etməyə imkan verəcək. Qremə görə, məqsəd "Putinə real təzyiq mexanizmi qurmaqdır". Trump da daha əvvəl bildirib ki, respublikaçıların hazırladığı layihə onu tam qane edir.

Sanksiyalar fonunda gizli danışıqlar

Bununla paralel, "The Wall Street Journal" və "Axios" nəşrləri yazır ki, Vaşinqton və Moskva 28 maddəlik gizli sülh planı üzərində çalışırlar. ABŞ tərəfini Trampın xüsusi nümayəndəsi Stiv Uitkoff, Rusiyanı isə Kirill Dmitriyev təmsil edir.

Plan dörd sahəni əhatə edir: Ukraynada atəşkəs, təhlükəsizlik zəmanətləri, Avropanın təhlükəsizliyi, ABŞ-Rusiya-Ukrayna münasibətlərinin gələcək modeli.

Mətbuata sızan iddialara görə, müzakirədə Krım və Donbasın statusunun faktiki tanınması, Ukrayna ordusunun ixtisarı və uzaqmənzilli silahlardan imtina kimi maddələr də var. Kiyev isə bu təklifləri "təslim planı" adlandırır və qəbuledilməz hesab edir.

Vaşinqtonun paralel "təzyiq üstəgəl danışıqlar" strategiyası ABŞ diplomatiyasının yeni mərhələsini göstərir. Bu yanaşmanın Putini danışıqlar masasına gətirib-gətirməyəcəyi hələ bilinmir, lakin Ukraynada narahatlıq bir məsələni artırır: qərar masasında yalnız böyük güclər əyləşib.