"Tramp Rusiyaya qarşı yeni sanksiyalara razıdır, amma şərti var" - "Reuters"

"Vaşinqtonda yeni sanksiya paketi irəli sürülüb, lakin qərarın taleyi yenə Trampın siyasi hesablamalarından asılıdır..."

"Reuters" agentliyinin məlumatına görə, ABŞ prezidenti Donald Tramp Rusiyaya qarşı yeni sanksiyalar paketini dəstəkləməyə hazırdır. Lakin o, bir şərt irəli sürüb: sənəddə sanksiyaların tətbiqində son qərar mexanizminin tam olaraq prezidentin əlində qalması açıq şəkildə göstərilməlidir.

Ağ Ev bildirir ki, Tramp artıq ilkin razılıq siqnalı verib və Konqresdə hazırlanan paketi "ümumilikdə qənaətbəxş" adlandırıb. Prezident həmçinin təklif edib ki, sanksiyalar siyahısına İran da əlavə edilsin.

Konqres hərəkətə keçir: ikinci dalğa sanksiyalar

Senator Lindsi Qrem və konqresmen Brayan Fitspatrik tərəfindən irəli sürülən təşəbbüs artıq Konqresdə müzakirəyə çıxarılır. Qremin sözlərinə görə, yeni sənəd Trampa Rusiyanın enerji resurslarını alan ölkələrə qarşı həm sanksiyalar, həm də tariflər tətbiq etmək imkanı verəcək.

Qrem bildirib ki, məqsəd Kremlin hərbi maşınının maliyyə mənbələrini daraltmaq və Putini danışıqlar masasına məcbur etməkdir. Onun sözlərinə görə, sanksiyalar həmçinin İran kimi Moskvanı dəstəkləyən tərəflərə də yönələcək.

Tramp nə istəyir?

Hazırkı mərhələdə Tramp ən sərt variantı seçməsə də, sanksiyaların genişləndirilməsinə razıdır, amma yalnız o halda ki, mexanizmə tam nəzarət onda qalsın.

Ekspertlər hesab edir ki, prezidentin bu mövqeyi Vaşinqtonun Moskva ilə paralel gizli danışıqları davam etdirdiyini göstərir, baxmayaraq ki, mövzu artıq informasiya gündəmindən kənarda qalıb.

Yeni paket qəbul olunsa, Trampın Kremlin üzərinə təzyiq alətləri daha da genişlənəcək və ABŞ siyasəti Ukrayna müharibəsinin sonrakı mərhələsində daha sərt kontur alacaq.

Moderator.az