"Rusiyada küçə etirazları artır: cəmiyyət səssiz narazılıqdan açıq aksiyalara keçir" - "Deutsche Welle"

"Rusiya Ukraynaya qarşı başlatdığı müharibənin dördüncü ilində daxili narazılığın yeni mərhələsi ilə üz-üzədir..."

Müharibənin fonunda küçələrdə artan narazılıq

"Deutsche Welle"  nəşrinin məlumatında deyilir ki, Rusiyanın müxtəlif regionlarında etiraz aksiyalarının sayı artır. Bu barədə "Можем объяснить" Telegram-kanalı yazıb. Artıq tək-tük lokal narazılıqlar yox, ardıcıl və müxtəlif formatlarda keçirilən aksiyalar müşahidə olunur. Bu prosesin ən nəzərə çarpan nümunələrindən biri - musiqiçilərin "StopTime" qrupunun üzvlərinə dəstək olaraq "xarici agent" elan edilmiş sənətkarların mahnılarını ifa etməsidir. 

Qrupun solisti Diana Loqinova (Naoko), onun nişanlısı Aleksandr Orexov və musiqiçi Vladislav Leontyev "karusel həbs" adlandırılan təzyiqlə üzləşib, yəni cinayət işi açılmadan həbs müddətləri təkrar-təkrar uzadılır. Bu aksiya son zamanlar artan ictimai narazılığın rəmzinə çevrilib.

Etirazların coğrafiyası və səbəbləri genişlənir

Etirazların mövzu dairəsi də genişdir - yalnız siyasi motivlər deyil, sosial və iqtisadi problemlər də insanları küçələrə çıxarır.

Etirazların mövzuları:

- müxtəlif regionlarda utilizasiya rüsumunun qaldırılmasına qarşı aksiyalar;

- "Max" dövlət messenceri tətbiqinin məcburi tətbiqinə qarşı mitinqlər;

- Primorskaya İstilik Elektrik Stansiyasında işləyən podratçıların gecikən maaş tələbləri;

- Kursk vilayəti sakinlərinin bombardman nəticəsində dağıdılmış evlərə görə kompensasiya tələbi;

- Permdə qeydiyyatsız "Rassvet" hərəkatının üzvləri tərəfindən keçirilən anti-müharibə piketi.

Bu aksiyaların əksəriyyəti spontan və yerli səviyyədə olsa da, onların sayı və coğrafiyası narazılığın strukturlaşmağa başladığını göstərir.

"Səssiz etiraz": qadağan olunmuş yazıçılara maraq artır

Etirazlar yalnız küçə aksiyaları ilə məhdudlaşmır. Mənbə yazır ki, Rusiyada "səssiz müxalifət" güclənir - insanlar qadağan edilmiş yazıçıların, "xarici agent" və ya "ekstremist" elan olunmuş müəlliflərin kitablarını sürətlə alır və oxuyurlar. Bu kitablar əsasən xaricdə çap olunur və ölkəyə qeyri-rəsmi yollarla gətirilir. Kanal bunu cəmiyyətin hakimiyyətə qarşı passiv, lakin davamlı dirənişi kimi təqdim edir.

Beləliklə, Rusiyada narazılıq artıq təkcə sosial şikayətlər səviyyəsində deyil,  müharibə, senzura və nəzarət mexanizmlərinə qarşı siyasi etiraz forması alır. Etirazların hələ kütləvi və koordinasiyalı olmamasına baxmayaraq, müşahidəçilər bunu "dondurulmuş cəmiyyətin yavaş, lakin nəzərəçarpan oyanışı" kimi qiymətləndirir.

Moderator.az