"Qocalıqda həyatı dolğun yaşamağın dörd açarı" - Psixoloqlardan açıqlama

"Sadəlik, daxili azadlıq və hər günün dəyərini dərk etmək - tənha qalmaq da bir hədiyyədir..."

"Московский комсомолец" nəşri yazır ki, çoxumuz yetkin yaşları ailə və dostlarla dolu, rahat və səmimi illər kimi təsəvvür edirik: həyat yoldaşı ilə gündəlik qayğıları bölüşmək, uşaqların uğurlarına sevinmək, dostlarla ürəkdan söhbətlər etmək. 

Lakin reallıq bəzən fərqlidir: altmış yaşa çatanda çoxları səssizlik içində öz düşüncələri ilə tək qalır. Bu tənha məkan isə əslində daxili dayanıqlığın və həyat məmnuniyyətinin qaynağı olur.

Özünlə tək qalma bacarığı

Tək qalmaq təcrid deyil, özünü tanımaqdır. Səhər ritualı - bir fincan ətirli çay, sakit musiqi, sevimli kitabları yenidən oxumaq həyatın mənasını artırır. Müasir psixoloqlar bildirir ki, gündəlik 15-20 dəqiqə meditasiya və yazı ilə məşğul olmaq zehni sağlamlığı qoruyur, emosional sabitliyi artırır. Özünü dinləmək qocalıqda daxili balansı möhkəmləndirir.

Sadəlik və nizam-intizam

Hər əşyanın öz yeri olduğu, artıq yük yaratmayan ev həyatımızı yüngülləşdirir. Minimalist həyat tərzi yalnız fiziki məkandan deyil, düşüncələrdən də yükü azaldır. Araşdırmalar göstərir ki, nizam-intizamlı mühit stresi azaldır, diqqəti cəmləməyə kömək edir və xatirələri daha yaxşı təşkil edir.

Xarici qiymətləndirmələrdən azadlıq

Yaş artdıqca başa düşülür ki, həyatı başqalarının gözləntilərinə uyğun deyil, öz daxili səsimizə görə yaşamalıyıq. Rahat geyinmək, sevdiyin musiqini dinləmək - bu, daxili azadlığın göstəricisidir. Özünü qəbul edən insanlar daha az narahat olur və sosial təzyiqlərə daha dözümlüdür.

Hər günün dəyərini anlamaq

Sadə, lakin mənalı gündəlik işlər - pəncərə önündə çiçək böyütmək, parkda gəzinti, jurnal yazmaq və ya sevimli yeməyi bişirmək həyat ritmini yaradır və hər günün unikallığını xatırladır. Bu rutin fəaliyyətlər yaddaşı möhkəmləndirir, emosional sabitliyi qoruyur və həyatdan zövq almağa imkan verir.

Yaxın insanlar yanımızda da,  uzaqda da ola bilər, amma bu dörd dayağımız  - tək qalma bacarığı, nizamlı həyat tərzi, daxili azadlıq və öz dəyərini dərk etmək hər zaman bizimlə qalır. Onlar həyatı dolğun yaşamaq, sadə zövqlərdə sevinc tapmaq və daxili sakitliyi qorumaq üçün əvəzolunmazdır.