"Qızıl və gümüş inamın deyil, reallığın dəyər ölçüsüdür" - Nəzər nöqtəsi

"Niyə qızıl və gümüş əsrlər boyu qalıcı aktivlər sayılır?.."

Müasir maliyyə sistemi, texnologiya və rəqəmsal alətlər nə qədər mürəkkəb görünsə də, əslində çox sadə bir prinsip - vəd vermək üzərində dayanır.

Moderator.az xəbər verir ki, bu barədə "zolotoy-zapas.ru" nəşri yazıb.

İnam üzərində qurulan sistem

Hər bir aktiv forması - səhmlər, istiqrazlar, daşınmaz əmlak və hətta bankdakı pul sadəcə gələcəkdə yerinə yetiriləcəyi gözlənilən vədlərdir. Səhmlər gəlir vədi, istiqrazlar borcun qaytarılması vədi, bank hesabındakı rəqəmlər isə çevrilmə vədi daşıyır.

Amma bu vədlərin hamısı elastikdir: inam artdıqca genişlənir, inam itdikcə isə partlayır. Tarix boyu yaşanan böhranların çoxu məhz resurs çatışmazlığından yox, inamın çökməsindən yaranıb. Likvidlik,  yəni bazarın sağlamlığı əslində inamın göstəricisidir. İnvestorlar bir-birinə inanmadıqda, sistem dayanır.

Bunun əksinə, qızıl və gümüş heç bir vəd üzərində qurulmayıb. Onlar heç kimin sözünə, siyasətinə və ya iqtisadi qərarına möhtac deyil. Bu iki metal inamın deyil, reallığın ifadəsidir. Ona görə də onların dəyəri əsrlərlə qalır: çünki bu dəyər insan fəaliyyətindən doğur, amma onun manipulyasiyasına tabe olmur.

Fiziki aktivlərin oyanışı: vədlərin tükəndiyi nöqtə

Son illərdə qızıl və gümüş qiymətlərinin artımı bir çoxlarına spekulyativ sıçrayış kimi görünür. Halbuki bu, rəqəmsal iqtisadiyyatın fiziki reallığa korreksiyasıdır. İllərlə azalmış investisiyalar, sənayedəki gərginlik və resursların tükənməsi - hamısı bir yerdə bu metalların dəyərini artırır.

Qızılın dalğalanması onun zəifliyinin deyil, reaksiya qabiliyyətinin göstəricisidir. Maliyyə sistemində kreditlər təminatsız genişlənəndə, qızıl balans rolunu oynayır. O, gəlir gətirən aktiv deyil, dəyərləri ölçən vasitədir.

Bu da bir həqiqəti yada salır: maddi sərhədlər hələ də mövcuddur. Banklar və hökumətlər inamı süni yollarla qoruya bilsələr də, təbiətin və iqtisadiyyatın fiziki məhdudiyyətlərini aradan qaldıra bilməzlər. Nə vaxt ki, sistem öz illüziyalarından bezir, qızıl və gümüş səhnəyə qayıdır.

Gerçək sərvətə dönüş: metalların susqun dərsi

Qızıl və gümüş sadəcə alternativ investisiya vasitəsi deyil, onlar insan sivilizasiyasının davranış güzgüsüdür. Qızıl - inamı, gümüş - istehsalın maddi tərəfini ölçür. Onların dəyəri heç bir tərəf müqaviləsinə, fond bazarına və ya kredit reytinqinə bağlı deyil. Onlar gəlir gətirməsə də, heç vaxt iflas etməzlər.

Mərkəzi banklar bunu yaxşı anlayır, ona görə də qızıl ehtiyatlarını artırırlar. Bu, keçmişə nostalji deyil, maliyyə reallığının qəbuludur. Çünki bir gün gələcək ki, bugünkü vədlər yalnız çap olunmayan, reallıqda mövcud olan aktivlərlə təmin edilə bilər.

Dünya iqtisadiyyatı indi yeni mərhələyə - məhdudiyyətlər mərhələsinə daxil olur. Enerji qiymətləri, borc yükü və tədarük zəncirlərinin kövrəkliyi artıq sistemin sərhədlərini cızır. İnvestorlar üçün bu metalların verdiyi əsas dərs budur: vədlər unudula bilər, amma reallıq - heç vaxt. Qızıl və gümüş məhz buna görə zamanın sınağından keçib, çünki onların dəyəri inamdan yox, insanlığın öz fəaliyyətindən doğur.