"Ukrayna Rusiya xüsusi təyinatlılarının "elitasını" məhv etdi və hərbi zavoda raket zərbəsi endirdi" - "Deutsche Welle"

"Kiyev həm ön cəbhədə, həm də dərin arxada uğurlu əməliyyatlar həyata keçirərək Rusiyanın hərbi potensialına ağır zərbə vurur..."

Ukrayna müdafiə qüvvələri Rusiya ordusunun ən gizli və hazırlıqlı bölmələrindən olan "Senej" və "Kubinka" xüsusi təyinatlılarını məhv edib.

Moderator.az xəbər verir ki, bu barədə "Xoçu jit" ("Yaşamaq istəyirəm") layihəsi məlumat verib. Məlumatı "dw.com" nəşri yayıb.

"Elita içində elita"nın sonu

Siyahıya əsasən, bu əməliyyatlar nəticəsində onlarla rusiyalı zabit - XƏQ (Xüsusi Əməliyyatlar Qüvvələri) və BKİ-nin (Baş Kəşfiyyat İdarəsi) yüksək ixtisaslı kadrları sıradan çıxarılıb.

Xüsusilə, Çerniqov yaxınlığında "Senej" mərkəzinə məxsus diversiya qrupu tamamilə məhv edilib. 54-cü kəşfiyyat taboru və sərhəd qoşunlarının birgə əməliyyatı zamanı altı rus zabiti öldürülüb, onların silah və sursatı ələ keçirilib.

Bu bölmələr Rusiya Baş Qərargahına birbaşa tabe olan, Qərb proqramları üzrə illərlə hazırlıq keçən elita qrupları hesab olunur. Ekspertlər bildirir ki, belə döyüşçülərin itirilməsi Rusiya üçün strateji cəhətdən ciddi zərbədir, çünki onların hazırlanması illər və böyük resurslar tələb edir.

Layihənin məlumatına görə, 2022-ci ildən bəri Ukraynada azı 58 xüsusi təyinatlı, BKİ və FTX (Federal Təhlükəsizlik Xidməti) zabiti məhv edilib.

"Storm Shadow" raketləri ilə zərbə

Ukrayna Silahlı Qüvvələrinin Baş Qərargahı Bryansk kimya zavoduna zərbə endirildiyini təsdiqləyib. Zavodda barıt, partlayıcı maddələr və raket yanacağı komponentləri istehsal olunurdu.

Oktyabrın 21-də həyata keçirilən kütləvi raket-aviasiya hücumunda "Storm Shadow" tipli hava bazalı raketlərdən istifadə olunub. Ukrayna Hərbi Hava Qüvvələri, Quru Qoşunları və Donanmanın birgə əməliyyatı nəticəsində müəssisə ciddi şəkildə zədələnib.

Ukrayna tərəfi bəyan edib ki, bu cür zərbələrin məqsədi Rusiyanın hərbi-sənaye kompleksini zəiflətmək və onun hücum qabiliyyətini məhdudlaşdırmaqdır.

Kreml üçün yeni mərhələ

Rusiya tərəfi ön cəbhədə elit qüvvələrinin itkiləri və arxa cəbhədə sənaye obyektlərinə zərbələrlə üz-üzə qalıb. Analitiklər qeyd edir ki, bu iki istiqamətli - həm insan resurslarına, həm də hərbi istehsala hücum Moskvanın uzunmüddətli döyüş imkanlarını sarsıdır.

Qərb mənbələri Ukraynanın bu əməliyyatlarını "keyfiyyətcə yeni mərhələ" adlandırır: artıq söhbət yalnız müdafiədən deyil, Rusiya hərbi sisteminin əsas sütunlarına birbaşa zərbələrdən gedir.