"MAQATE Zaporojye AES-in elektrik təchizatını iki mərhələdə bərpa etməyi təklif edir" - "Associated Press"

"Zaporojye AES-də enerji kəsilməsi və nüvə təhlükəsizliyi riskləri..."

Beynəlxalq Atom Enerjisi Agentliyi (MAQATE) Rusiyanın işğalı altında olan Zaporojye Atom Elektrik Stansiyasının (ZAES) elektrik təchizatını bərpa etmək üçün iki mərhələli plan təklif edib.

Moderator.az xəbər verir ki, bu barədə " Associated Press" agentliyi məlumat yayıb.

İkimərhələli plan

Agentliyin mənbələrinə görə, planın birinci mərhələsi çərçivəsində 1,5 km radiuslu atəşkəs zonasının yaradılması nəzərdə tutulur. Bu addım Rusiyanın nəzarətində olan ərazidə zədələnmiş "Dniprovska" 750 kV-luq xəttinin təmirini həyata keçirmək üçün zəruridir.

Planın ikinci mərhələsi isə Kiyevin nəzarətindəki ərazidə yerləşən 330 kV-luq "Ferrospavlna-1" ehtiyat xəttinin təmirinə yönəlib. Bu mərhələdə də atəşkəs zonası yaradılmalıdır ki, təmir işləri təhlükəsiz şəkildə aparılsın.

MAQATE hər iki tərəflə intensiv təmasdadır

Plan əsasında MAQATE nümayəndələri təmir işləri zamanı stansiyada olacaqlar. Təmir işləri 11-17 oktyabr tarixləri arasında aparılması nəzərdə tutulub. Bir Avropa diplomatı "Associated Press"-ə bildirib ki, Ukrayna tərəfi təmir briqadaları üçün təhlükəsizlik zəmanətləri verib, lakin Rusiya tərəfi bu sahədə öhdəlik götürməyib.

MAQATE hələ ki, dəqiq vaxt cədvəli barədə şərh verməyib. Lakin agentliyin rəhbəri Rafael Qrossi "hər iki tərəflə intensiv əlaqə saxlayır" və məqsədin elektrik təchizatını bərpa etmək və nüvə qəzasının qarşısını almaq olduğu vurğulanır.

Elektrik kəsilməsi və təhlükəli rejim

Xatırladaq ki, Zaporojye AES uzun müddətdir Ukrayna enerji sistemindən ayrılıb. Hazırda stansiya dizel-generatorlar üzərində işləyir ki, bu da qəza rejimidir və nüvə təhlükəsizliyi baxımından ciddi risk yaradır.

MAQATE nümayəndələri oktyabrın 6-da stansiya ərazisində atəş səslərini qeydə alıb, bu, stansiyanın perimetrindən 1,25 km məsafədə olub.  Elektrik təchizatının kəsilməsi ilə əlaqədar ZAES-də nüvə təhlükəsizliyi vəziyyəti hələ də kritik olaraq qalır.

MAQATE-in təklif etdiyi iki mərhələli planın həyata keçirilməsi Zaporojye AES-də nüvə qəzasının qarşısını almaq və stansiyanı normal rejimə qaytarmaq üçün yeganə real yol hesab olunur. Təhlükəsizlik zəmanətlərinin verilməsi və atəşkəs zonalarının yaradılması isə planın uğuru üçün əsas şərtlərdir.