"Putinin gizli silahı: seks, şantaj və kompromatla qurulan imperiya" - "The Sun"

DTK metodları ilə formalaşmış Kreml sistemi illərdir şəxsi sirlər və "çirkli" məlumatlar üzərində idarə olunur...

Rusiya diktatoru Vladimir Putin artıq onilliklərdir ki, hakimiyyətini yalnız güc və təbliğatla deyil, həm də gizli şantaj mexanizmləri vasitəsilə qoruyur.

Moderator.az xəbər verir ki, bu barədə "The Sun" nəşri yazıb.

Nəşr qeyd edir ki, DTK-dan yetişmiş keçmiş casus şəxsi həyat və kompromat üzərində qurulan bu sistemi mükəmməl şəkildə mənimsəyib. Qərb ekspertlərinin fikrincə, Putinin hakimiyyətinin təməli məhz insanın ən gizli və zəif tərəflərinə - seks, pul və şəxsi asılılıqlara söykənir.

Kompromat imperiyasının kökləri

Nəşrin araşdırmasına görə, "kompromat", yəni ifşaedici materiallar Rusiya dövlət idarəçiliyinin ayrılmaz hissəsinə çevrilib. Bu anlayışın kökləri 1930-cu illərə, Stalin dövrünün sovet təhlükəsizlik orqanlarına gedib çıxır. Həmin illərdə gizli xidmətlər və partiya aparatları kompromatı siyasi nəzarət və şəxsi asılılıq aləti kimi istifadə edib.

DTK üzrə ekspert Mark Harrisson bildirir ki, SSRİ dövründə yüksək vəzifələrə çox vaxt "ləkəli keçmişi" olan adamlar təyin edilib: "Belələrinə etibar etmək asan idi, çünki onların sirləri rəhbərliyin əlində olub. Onlar satqın ola bilməzdilər, çünki bu, öz məhvinə bərabər olardı". SSRİ dağıldıqdan sonra kompromat artıq yalnız gizli nəzarət üçün deyil, həm də ictimai nüfuzun məhvi üçün istifadə olunmağa başlanıb.

1999-cu ilin "üçlük qalmaqalı" və Putinin yüksəlişi

Putinin siyasi karyerasında dönüş nöqtəsi 1999-cu ildə baş verib. Həmin vaxt baş prokuror Yuri Skuratov Yeltsin dövrü Kremlin korrupsiyasını araşdırıb. Lakin qəfil dövlət televiziyasında "Üç nəfər bir yataqda" adlı video yayımlanıb. Keyfiyyətsiz kadrlarda Skuratovun iki qadınla yataqda olduğu iddia edilib.

Maraqlısı budur ki, həmin vaxt Federal Təhlükəsizlik Xidmətinə rəhbərlik edən Putin şəxsən mətbuat konfransına çıxaraq videonun "orijinallığını" təsdiqləyib. Ekspertlərin sözlərinə görə, bu, "qara piar"ın klassik nümunəsi idi - "ittiham et və məhv et".

Hadisədən bir neçə ay sonra Yeltsin Putinin bu "bacarığından" heyrətlənərək onu baş nazir təyin edib və az sonra öz varisi elan edib. Beləcə, seks və şantaj üzərində qurulan sistem Rusiya hakimiyyətinin əsas sütununa çevrilib.

Loyal elita və qorxu balansı

Bu gün Kreml elitası arasında yalnız bir qayda işləyir: yalnız sənin sirrini bilən sənə güvənə bilər. Harrisson bunu belə izah edir: "Əgər mən bilirəmsə ki, sənin keçmişində gizli bir ləkə var, sən heç vaxt mənə qarşı çıxmayacaqsan. Çünki mən səni bir kadrla məhv edə bilərəm". Buna görə də Putin yalnız "çirkli keçmişi" olan məmurlarla işləməyi üstün tutur - bu, onların sədaqətini avtomatik təmin edir.

Casus oyunları: seks-tələlər və gizli kameralı otellər

Britaniyalı kəşfiyyat zabiti Filip İnqr qeyd edir ki, Rusiya xüsusi xidmət orqanları kompromat toplamaqda müntəzəm işləyir. Onun sözlərinə görə, Moskvaya gələn xarici diplomatlar və siyasətçilər çox vaxt "casus tələləri"nə düşür: "Rusiya otellərində otaqlara gizli kameralar və səs yazıcıları quraşdırılır. Bəzən cəlbedici qadınlar vasitəsilə "səhnə" qurulur, sonra isə həmin görüntülər siyasi alver üçün istifadə olunur". Bu, həm şəxsi nəzarət, həm də gələcəkdə təzyiq üçün ideal material yaradır.

Kompromatın iki məqsədi

Birincisi, rəqibləri aradan qaldırmaq: Putin sistemi üçün ən rahat metod fiziki yox, mənəvi məhvetmədir. 2016-cı ildə müxalifət lideri Mixail Kasyanovun öz köməkçisi ilə intim videosunun yayılması onun siyasi karyerasını iflic etmişdi - bu, Kremlin "təmiz" qələbəsi idi.

İkincisi, demokratiyanı gözdən salmaq: Geosiyasət eksperti Entoni Qliz hesab edir ki, kompromat texnologiyası yalnız şəxsləri deyil, bütün demokratik prosesi diskreditasiya edir: "Putin insanları korrupsioner kimi göstərməklə demokratik institutların legitimliyini məhv edir".

Seks və pul Putinin hakimiyyət valyutasıdır

Putin üçün seks və pul sadəcə zəiflik deyil, hakimiyyət valyutasıdır. Onların vasitəsilə o, həm öz elitasını, həm də beynəlxalq əlaqələrini idarə edir. Ekspertlərin fikrincə, bu sistemdə heç kim təmiz deyil. Hər kəsin barəsində nəsə var - və bu "nəsə" Putinin real silahıdır. Putin rejimi təkcə zorakılıq və təbliğatla deyil, insanın öz sirrinə qarşı çevrilmiş qorxusu üzərində qurulub. Bu, DTK-nın mirasıdır və Kremlin bu mirası qorumaqda əsas silahı hələ də eynidir: kompromat, seks və sükut.