"Ukrayna ilə Rusiya arasında dron savaşı: logistika və enerji zərbə altında" - Ukrayna KİV-ləri

"Ukraynanın dəmir yolu sisteminə hücumlar, Rusiyanın isə neft obyektlərinə zərbələr yeni mərhələyə işarədir..."

27 sentyabr səhəri Rusiyanın pilotsuz uçuş aparatları Odessa vilayətində dəmir yolu infrastrukturuna hücum edib.

Moderator.az xəbər verir ki, bu barədə "obozrevatel.com" nəşri məlumat yayıb.

Rusiyanın zərbələri Odessada dəmir yolunu iflic edib

Ukrayna Dəmir Yolları bildirir ki, xeyli ziyan dəyməsinə baxmayaraq, xəsarət alan olmayıb. Təhlükəsizlik üçün sərnişin qatarları hücum nöqtələrindən uzaq saxlanılıb. Hərəkət bərpa olunsa da, bir sıra qatarlar ciddi gecikmələrlə davam edib. Odessa-Kiyev qatarı 3 saat 42 dəqiqə, əks istiqamətdə isə 3 saat 3 dəqiqə ləngiyib. Digər marşrutlarda da 1-2,5 saatlıq gecikmələr qeydə alınıb.

Dəmir yoluna qarşı sistemli hücumlar

Ukrayna tərəfi qeyd edir ki, son həftələr Rusiya hər gecə 6-7 "Shahed" tipli drondan istifadə etməklə dəmir yoluna intensiv hücumlar həyata keçirir. Sentyabrın 25-də oxşar zərbələr nəticəsində Nikolayev və Kirovoqradda elektrik təchizatında ciddi kəsintilər olub.

Çuvaşıyada neftötürmə stansiyası vurulub

Eyni gündə Rusiyada da dron hücumu qeydə alınıb. Çuvaşıya Respublikasında neftötürmə stansiyası səhər saatlarında pilotsuz aparatın hədəfinə çevrilib. Yerli hakimiyyət obyektin "az ziyan gördüyünü" açıqlasa da, fəaliyyət tamamilə dayandırılıb. Respublika rəhbəri Oleq Nikolayev əhali və işçilər arasında xəsarət olmadığını bildirib.

Rusiyanın enerji infrastrukturuna artan zərbələr

Bu hücum Ukraynanın Rusiyanın neft sənayesinə qarşı intensivləşən strategiyasının tərkib hissəsidir. Bir gün əvvəl Krasnodar vilayətindəki Afipski neft emalı zavodu vurulub, müəssisədə yanğın baş verib. Bu zavod Rusiya ordusunu yanacaqla təmin edən əsas mərkəzlərdən biridir və artıq dəfələrlə hədəfə alınıb. Avqustun əvvəlindən Ukrayna dronları Rusiya daxilində neft emalı zavodlarını sistemli şəkildə vurur. Avqustun 2-də Ryazan və Samara vilayətlərindəki zavodlara da zərbələr endirilib.

Savaşın yeni mərhələsi

Müharibənin bu mərhələsi həm Ukraynanın logistikasını çətinləşdirən dəmir yolu hücumları, həm də Rusiyanın yanacaq təminatını iflic edən zərbələrlə xarakterizə olunur. Qarşılıqlı dron hücumları hər iki tərəfin döyüş qabiliyyətinə ciddi təsir göstərir və müharibəni daha da gərginləşdirir.