"İspaniya və İtaliya "Global Sumud" flotiliyasını müşayiət etmək üçün hərbi gəmilər göndərir" - "Euronews"

"Bu, sülhpərvər və beynəlxalq hüquqa uyğun missiyadır və heç bir ölkə humanitar yardımın Qəzzaya çatmasına mane ola bilməz..."

Avropanın iki böyük dövləti - İspaniya və İtaliya Qəzzaya doğru hərəkət edən "Global Sumud" flotiliyasını müşayiət etmək və qorumaq üçün hərbi gəmilər göndərmək barədə qərar qəbul edib.

Moderator.az xəbər verir ki, bu barədə "euronews.com" nəşri məlumat yayıb.

Məlumatda deyilir ki, bu addım fəalların son günlərdə dron hücumları, rabitə siqnallarının pozulması və naməlum partlayışlar barədə verdiyi xəbərlərdən sonra atılıb.

Roma və Madridin addımı

İtaliya ilk olaraq çoxməqsədli freqatını flotiliyanın yolunu təmin etmək üçün göndərib. Müdafiə naziri Qvido Krozetto bildirib ki, gəmi zərurət yaranacağı təqdirdə xilasetmə əməliyyatları da həyata keçirəcək. O, həmçinin İsraili bu qərar barədə məlumatlandırdıqlarını açıqlayıb.

Baş nazir Corca Meloni isə flotiliyaya edilən hücumları pisləsə də, təşəbbüsü "təhlükəli və məsuliyyətsiz" adlandırıb. Meloni alternativ olaraq humanitar yardımın Kiprdəki Latın Patriarxlığına təhvil verilməsini təklif edib.

Bir gün sonra İspaniyanın baş naziri Pedro Sançes BMT Baş Assambleyasında çıxış edərək elan edib ki, Madriddə də flotiliyaya qoşulmaq üçün patrul gəmisi göndəriləcək. Sançes beynəlxalq hüququn qorunmasını və Avropa vətəndaşlarının Aralıq dənizində təhlükəsiz üzmə haqqının təmin edilməsini tələb etdiyini vurğulayıb.

İsrailin mövqeyi

İsrail isə qəti mövqedə qalır: Təl-Əviv "Global Sumud" flotiliyasının Qəzzaya çatmasına icazə verməyəcəyini açıqlayıb. Xarici İşlər Nazirliyi bildirib ki, əgər məqsəd həqiqətən humanitar yardım çatdırmaqdırsa, gəmilər ya Aşkelona, ya da qonşu ölkələrin limanlarına yönləndirilməlidir. İsrailin izahına görə, Qəzza blokadası HƏMAS-ın silah idxalının qarşısını almaq üçün vacibdir. Müxaliflər isə bunu kollektiv cəza üsulu hesab edirlər.

Flotiliyanın məqsədi və müqavimət

"Global Sumud" 44 ölkədən olan vətəndaşların dəstəklədiyi, 50-dən çox kiçik gəmiyə malik bir flotiliyadır. Onların məqsədi 18 ildir davam edən Qəzza blokadasını yarmaq və humanitar yardım çatdırmaqdır. Braziliyalı aktivist Tyaqo Avila bildirib: "Bu, sülhpərvər və beynəlxalq hüquqa uyğun bir missiyadır. Heç bir ölkə humanitar yardımın Qəzzaya çatmasına mane ola bilməz".

Flotiliya 2025-ci ilin sentyabrında Barselonadan yola düşüb. Yola salınma mərasimində yüzlərlə insan limanı doldurub. Hərəkət başladıqdan sonra fəallar Tunis və Yunanıstan sularında bir neçə hücum barədə məlumat versələr də, sübut təqdim etməyiblər. Onlar hücumların arxasında İsrailin dayandığını iddia edir. Bu, Qəzzaya çatmaq üçün ilk cəhd deyil. Hələ iyul ayında İsrail qüvvələri beynəlxalq sularda "Azadlıq Flotiliyası"nı saxlayaraq missiyanın qarşısını alıb.