"Tramp artıq anlamalıdır ki, bu müharibə onun müharibəsidir" - "The New York Times"

"Mən Trampın və Vensin Putinə olan sevgilərindən iyrənirəm..."

ABŞ prezidentinə qarşı həm mediada, həm də Senatda sərt tənqidlər artır

ABŞ prezidenti Donald Trampın Ukrayna müharibəsinə yanaşması artıq təkcə Avropada deyil, həm də Amerikanın özündə ciddi müzakirə mövzusuna çevrilib.

Moderator.az xəbər verir ki, bu barədə "The New York Times" nəşri yazıb.

"Tramp yetkin lider kimi davranmır"

Nəşr qeyd edir ki, bir tərəfdən onun tərəfdarları Trampı "dünyanı yeni müharibədən qoruyan lider" kimi təqdim edir, digər tərəfdən həm Senatda, həm də nüfuzlu media dairələrində "Moskvanın əslində bundan faydalandığı" haqda narahatlıq artır.

Nəşrin şərhçisi Tomas Fridman yazır ki, Trampın Rusiyanın Polşa hava məkanını dronlarla pozması barədə reaksiyası dünyanı heyrətləndirib. Prezidentin məsələni "sosial şəbəkə blogeri" tərzində şərh etməsi, ciddi qərarlar əvəzinə istehzalı və kəskin, lakin qeyri-məsuliyyətli ifadələrlə kifayətlənməsi, ABŞ-ı zəif göstərir: "Tramp sərt qərar verən dövlət başçısı deyil, daha çox sosial şəbəkədə izləyici toplayan fenomen obrazı yaradır".

Fridman Trampın Putinə "yaltaqlananlara" qulaq asmasını təhlükəli adlandırır. Onun fikrincə, ABŞ prezidenti Ukraynaya lazımi hərbi və maliyyə dəstəyi verməsə, Putin zamanın öz tərəfində olduğunu düşünəcək və müharibəni uzatmaqda davam edəcək. "Bağışlayın, cənab prezident, indi bu, SİZİN müharibənizdir", - Fridman yazır. - "Əgər Ukraynaya yardım etməsəniz, tarixdə Hitleri sakitləşdirməyə çalışan Çemberlen kimi xatırlanacaqsınız".

"Putinə sevgilərindən iyrənirik"

"The Hill" nəşrinin məlumatına görə, Senatda narazılıq artıq açıq müstəviyə çıxıb. Respublikaçı senatorlar Trampın Rusiyaya qarşı sanksiyaları gecikdirməsini, Moskvanı daha sərt şəkildə cəzalandırmamasını kəskin tənqid edirlər. Bir senator emosional şəkildə bildirib: "Mən onların - Trampın və Vensin Putinə olan sevgilərindən iyrənirəm".

Qanunvericilər hesab edir ki, Vaşinqtondan gələn ziddiyyətli siqnallar ABŞ-ın müttəfiqlərini çaşdırır. NATO ölkələri Trampın birmənalı mövqe ortaya qoymasını gözləyir, çünki qeyri-müəyyənlik Avropanın müdafiə təhlükəsizliyinə də zərbə vurur.

Avropanın gözləntiləri və xəbərdarlıqları

Almaniya kansleri Fridrix Mers açıq şəkildə bildirib ki, əgər müharibə Putinin şərtləri ilə başa çatsa, bu, yalnız yeni işğalların başlanğıcı olacaq. Onun sözlərinə görə, Kreml bu zəiflikdən istifadə edib Baltikyanı ölkələrə və ya digər NATO üzvlərinə qarşı addım ata bilər.

Fransa prezidenti Emmanuel Makron isə qeyd edib ki, artıq 26 ölkə Ukraynaya həm maliyyə, həm də hərbi dəstək vermək barədə razılığa gəlib. O, bu müharibənin yalnız "Ukrayna uğrunda savaş" olmadığını, bütün Avropanın təhlükəsizliyi üçün sınaq olduğunu vurğulayıb.

Trampın tərəddüdü və daxili siyasət

ABŞ-da isə əlavə bir reallıq var: Tramp daxili siyasi balansı nəzərə almağa çalışır. O, sanksiyaların iqtisadi təsirlərindən çəkinir, xüsusən də neft və qaz bazarında qiymətlərin artmasından ehtiyat edir. Bununla belə, ekspertlərin fikrincə, tərəddüdün davam etməsi həm seçicilərin gözündə, həm də tarix qarşısında onun mövqeyini zəiflədəcək.

Beləliklə, həm Avropada, həm də ABŞ-da Donald Trampdan konkret addım gözlənilir. Onun tərəddüdü Ukraynanın müqavimətini zəiflədə, Putinə isə yeni fürsətlər aça bilər. Ekspertlərin ümumi qənaəti budur ki, əgər Tramp indi qərar verməsə, gələcəkdə bu müharibənin bütün məsuliyyəti birbaşa onun üzərində qalacaq.