"Avropada siyasi böhran: Ursula fon der Lyayenə etimadsızlıq göstərilə bilər" - "Deutsche Welle"

"Avropa Komissiyasının sədru ilk dəfə bu qədər geniş miqyaslı hücumlarla üz-üzədir..."

Avropa Parlamenti oktyabrın əvvəlində Avropa Komissiyasının sədri Ursula fon der Lyayenə qarşı etimadsızlıq səsverməsi keçirəcək.

Moderator.az xəbər verir ki, bu barədə Parlamentin spikeri Robert Metsola deputatlara məlumat verib. Məlumatı "dw.com" nəşri yayıb.

İki fraksiyadan eyni vaxtda müraciət

Məsələni gündəmə gətirənlər isə sağçı "Avropa uğrunda vətənpərvərlər" fraksiyası və solçu fraksiya olub. Qanunvericiliyə görə, etimadsızlıq yalnız Komissiyanın bütövlükdə tərkibinə yönəldilə bilər. Bu isə Ursula fon der Lyayenin şəxsi fəaliyyətinə yönələn ittihamların bütün Avropa Komissiyasını əhatə etməsi deməkdir. "Politico" nəşri qeyd edir ki, sağ və sol siyasi düşərgələrin eyni vaxtda etimadsızlıq təşəbbüsü ilə çıxış etməsi Avropa Parlamentinin tarixində misli görünməmiş hadisədir.

Sağların və solların ittihamları

Sağçıların müraciətində əsas tənqid hədəfi iqlim siyasəti və miqrasiya kursu olub. Onlar fon der Lyayeni şəffaflıq çatışmazlığında və senzurada da günahlandırır. Sol fraksiya isə Avropa Komissiyasını ABŞ prezidenti Donald Tramp ilə əldə olunan, lakin hələ imzalanmamış gömrük razılaşmasına görə kəskin tənqid edib. Fraksiya rəhbəri Martin Şirdevan bu sazişi Avropa sənayesinə hücum adlandıraraq, minlərlə iş yerinin məhv olacağı barədə xəbərdarlıq edib. O həmçinin Avropa Komissiyasını Qəzza bölgəsindəki humanitar böhranla bağlı susqunluqda ittiham edib.

Etimadsızlığın şansı və rəqəmlər

Ekspertlərin fikrincə, Ursula fon der Lyayen və Avropa Komissiyasının istefaya göndərilməsi real görünmür. Bunun üçün Avropa Parlamentində ikiqat əksəriyyət - həm iştirak edənlərin üçdə ikisinin, həm də bütün deputatların yarısından çoxunun səsi lazımdır. Bu isə minimum 361, tam tərkibdə səsvermə olarsa, 480 səs deməkdir.

İyuldakı oxşar səsvermə

Xatırladaq ki, iyul ayında da analoji etimadsızlıq təşəbbüsü olub. Rumıniyalı deputat Georgi Piperinin irəli sürdüyü həmin müraciət Komissiyanı Rumıniya prezident seçkilərinə müdaxilədə və müdafiə xərclərinin maliyyələşdirilməsi proqramında ittiham edib.

Həmin vaxt Ursula fon der Lyayen 360 səslə dəstəklənib, 175 deputat isə onun əleyhinə səs verib, 18 nəfər isə bitərəf qalıb. Nəticə öncədən proqnozlaşdırıldığı kimi, fon der Lyayen Komissiyası səs çoxluğu ilə öz mövqeyini qoruya bilib.

Növbəti sınaq öncəsi vəziyyət

Oktyabr səsverməsi Avropa İttifaqının siyasi gələcəyi üçün mühüm siqnala çevriləcək. İstefa ehtimalı zəif olsa da, həm sağdan, həm də soldan yönələn paralel hücumlar Ursula fon der Lyayenin Avropa siyasi səhnəsində nə qədər çətin mövqedə olduğunu açıq şəkildə göstərir.