"Putinin "sülh planı" güzəşt deyil, yeni müharibədir" - Kaya Kallas

"Qərb və Ukrayna liderləri Kreml rəhbərinin tələsinə düşməməyə çağırır..."

Avropa İttifaqının xarici işlər və təhlükəsizlik siyasəti üzrə ali nümayəndəsi Kaya Kallas Almaniyanın "Redaktionsnetzwerk Deutschland" nəşrinə müsahibəsində bildirib ki, Rusiyanın sülh adı altında təqdim etdiyi plan əslində klassik Kreml taktikasıdır.

Moderator.az xəbər verir ki, bu barədə "postimess.ee" nəşri məlumat yayıb. 

Onun sözlərinə görə, Moskva əvvəlcə heç vaxt ona aid olmayan əraziləri tələb edir, ardınca isə təhdidlərə əl atır. Bu isə Qərbi saxta müzakirələrə sürükləyir. Kallas xəbərdarlıq edib ki, əgər dünya ictimaiyyəti Putinin şərtlərinə uysaydı, nəticədə ruslar heç vaxt xəyal edə bilmədikləri qədər çox şey əldə edərdilər:

"Bu, kompromis deyil. Əgər əvvəldən absurd tələblər irəli sürülüb, sonra isə yalnız işğal edilmiş ərazilərin saxlanılması təklif olunursa, buna güzəşt demək olmaz. Təcavüzə görə mükafatlandırmaq yalnız daha böyük müharibə gətirəcək".

O, Almaniyada keçirilən sorğulara da toxunub və qeyd edib ki, əhalinin əksəriyyəti Ukraynanın ərazi güzəştlərinə razı olması fikrini dəstəkləsə də, bu, təhlükəli bir xülyadır. Kallasın fikrincə, hər hansı güzəşt Moskvanın əlini daha da gücləndirəcək.

"Torpaqları sülh vədinə dəyişməyəcəyik"

Ukrayna prezidenti Vladimir Zelenski də çıxışlarında bu mövqeyi dəstəkləyərək bildirib ki, ölkəsi heç vaxt öz ərazilərini Putinə vermək hesabına sülh əldə etməyəcək. "Yalnız torpaq güzəşti qarşılığında müharibənin dayanacağına inanmaq sadəlövhlükdür. Bu, həll deyil, sadəcə fasilədir. Elə 2008-ci ildə Gürcüstanda, 2014-cü ildə isə Krım və Donbasda olduğu kimi", - Zelenski vurğulayıb.

Onun sözlərinə görə, Ukrayna üçün yeganə məqbul yol müharibənin zəmanətli sonu, xalq üçün təhlükəsizlik təminatı və Rusiyanın törətdiyi cinayətlərə görə məsuliyyət daşımasıdır. Prezident həmçinin bildirib ki, ABŞ-ın müasir hava hücumundan müdafiə sistemləri və döyüş təyyarələri Ukraynanın Avropa tərəfdaşları ilə birgə Rusiya terrorunu dayandırmasına imkan verə bilər.

Çin amili və qlobal balans

Zelenski beynəlxalq diplomatiyanın başqa bir istiqamətinə də diqqət çəkib. Onun sözlərinə görə, Çinə təsir yolları tapılmalıdır ki, Pekin öz təsir imkanlarını Rusiyanın müharibəni dayandırması üçün işə salsın. "Rusiya artıq Çin üçün xammal tədarükçüsünə və siyasi asılı tərəfdaşa çevrilib. Amma məsələ odur ki, Pekini müharibəsiz yol seçməyə necə sövq etməliyik. Bu isə əsasən ABŞ, Avropa və "Böyük yeddilik"- in gücündən asılıdır", - o, qeyd edib.

Qərb qarşısında seçim

Kallasın və Zelenskinin bəyanatları bir nöqtədə birləşir: Rusiya ilə "güzəşt" adı altında aparılan istənilən müzakirə əslində Moskvanın tələsidir. Əgər Ukrayna torpaqlarından imtina edərsə, bu, sülhə deyil, yalnız yeni müharibələrə yol açacaq. Beləliklə, həm Avropa İttifaqı, həm də Kiyev Qərbi xəbərdar edir: Putinin təkliflərinə aldanmaq Ukraynanın müstəqilliyinə, Avropanın təhlükəsizliyinə və beynəlxalq nizamın gələcəyinə ən böyük zərbə olacaq.