"Ukrayna üçün qələbə, sadəcə torpaq deyil, varlığın qorunmasıdır" - Zelenski

"Rusiya Donbası tam işğal etsə, növbəti hədəf Xarkov və Dnepr olacaq..."

Ukrayna prezidenti Vladimir Zelenski Donbas uğrunda mübarizənin əhəmiyyətini vurğulayıb. Onun sözlərinə görə, Rusiya prezidenti Vladimir Putin ABŞ-a ilin sonuna qədər bütün Donetsk vilayətini ələ keçirəcəyini söyləyib.

Moderator.az xəbər verir ki, bu barədə Ukrayna prezidenti Vladimir Zelenski ABŞ-ın "ABC News" kanalına geniş müsahibəsində bəyan edib.

Donbasın taleyi və Putinin planları

Zelenski belə bir planın reallıqdan uzaq olduğunu deyərək, bunun üçün Kreml milyonlarla insanın həyatını qurban verməli olacağını bildirib. O, xatırladıb ki, Moskva Donbasın 70 faizini ələ keçirdiyi barədə yanlış təbliğat aparır: "Əslində 11 il əvvəl Krımı və Donbasın üçdə birini işğal ediblər. Son dörd ildə isə Donetsk vilayətinin yalnız  30 faizini ala biliblər. Qalan əraziləri biz hələ də qoruyuruq". Prezident həmçinin xəbərdarlıq edib ki, əgər Rusiya Donbası tam işğal etsə, növbəti hədəf Xarkov və Dnepr olacaq: "Xarkovda bir milyon yarım insan yaşayır. Onlar öz şəhərlərini tərk etməyəcəklər. Bu, böyük faciəyə çevrilə bilər. Dnepr isə ölkənin sənaye ürəyidir, iqtisadiyyatımızın dayağıdır".

"Ukrayna ordusunun təlimləri ölkə daxilində olmalıdır"

Zelenski Ukrayna Silahlı Qüvvələrinin güclənməsini ölkənin əsas təhlükəsizlik təminatı adlandırıb. Onun sözlərinə görə, artıq xaricdə keçirilən təlimlər səmərəli olmur, çünki döyüşçülər geri qayıtdıqdan sonra yenidən öyrədilməlidir: "Bu, tamamilə yeni müharibədir. Çoxlu texnologiya var və hər şey sürətlə dəyişir. Bizim əsgərlərimiz indi Avropa və ABŞ-dakı tərəfdaşlarımızdan daha çox döyüş təcrübəsinə sahibdir. Ona görə də təlim missiyaları məhz Ukraynada keçirilməlidir". ABŞ və Avropa ölkələri indiyədək on minlərlə ukraynalı hərbçini hazırlayıb. Lakin Zelenski hesab edir ki, gələcəkdə tədris prosesinin ölkə daxilində təşkili vacibdir.

Ukrayna üçün qələbənin mənası

Prezidentin fikrincə, Ukrayna üçün qələbə, sadəcə Rusiya ilə razılaşmaya getmək deyil, onun bütün ölkəyə nəzarətinin qarşısını almaqdır. "Putinin məqsədi Ukraynanın tam işğalıdır. Biz yaşadığımız müddətdə, müstəqilliyimizi qoruduğumuz müddətdə bu artıq qələbədir", - Zelenski bildirib. O, həmçinin Putinin danışıqlar üçün Moskvaya gəlmək təklifini rədd edərək, belə bir görüşün yalnız neytral məkanda baş tuta biləcəyini açıqlayıb. Zelenski eyni zamanda ABŞ prezidenti Donald Trampın vasitəçiliyini də istisna etməyib.

"Bufer zona" ideyasına etiraz

Son zamanlar Qərbdə və Moskvada Ukrayna ilə Rusiya arasında "bufer zona" yaradılması müzakirə olunur. Zelenski isə bu ideyanı sərt tənqid edib: "Bizim artıq öz "bufer zonamız" var, bu, 10-20 kilometrlik ölüm sahəsidir. Hər hansı tank, maşın, motosiklet ora daxil olduqda dronlar tərəfindən məhv edilir. Ona görə də yeni bufer zona yaratmaq, sadəcə səhvdir".

O, bildirib ki, belə təşəbbüslər Ukraynanın təhlükəsizliyini möhkəmləndirmir, əksinə, Rusiyanın növbəti ekspansiyası üçün fürsət yaradır. Zelenskinin müsahibəsi Ukraynanın bu gün qarşılaşdığı reallığı açıq şəkildə göstərir: Donbas uğrunda döyüş təkcə torpaq mübarizəsi deyil, həm də ölkənin gələcəyi və müstəqilliyi uğrunda savaşdır. Qələbə Ukraynanın yaşaması, məğlubiyyət isə dövlətin tamamilə yox olması deməkdir.