"Moskva ilə yeni qarşıdurma Finlandiyanın dövlətçiliyinə son qoya bilər" - Medvedev

"Rusiya Finlandiyadan İkinci Dünya müharibəsi zamanı vurulan ziyanın ödənilməsini tələb edə bilər..."

Rusiya Təhlükəsizlik Şurası sədrinin müavini Dmitri Medvedev son çıxışında Finlandiyanı sərt şəkildə hədəfə alıb. O, Helsinkini "Rusiya üçün potensial təhlükə" adlandıraraq NATO-ya qoşulmanı ölkənin hərbi "platsdarmına" çevrilməsi kimi təqdim edib.

Moderator.az xəbər verir ki, bu barədə "tass.ru" agentliyi məlumat yayıb.

Moskva Finlandiya ilə sərhəddə hərbi təzyiqi artırır

Medvedev qeyd edib ki, Alyans Finlandiyanın "beş əməliyyat mühitini" - quru, dəniz, hava, kosmos və kiberhücum sahələrini fəal şəkildə mənimsəyir. O, həmçinin "Mannerheym xətti"ni xatırladaraq fin hökumətinə xəbərdarlıq edib: Moskva ilə yeni qarşıdurma Finlandiyanın dövlətçiliyinə son qoya bilər. O, əlavə edib: "Biz 1944-cü ildə olduğu kimi onlarla yumşaq davranmaq fikrində deyilik".

Bu, Ukraynaya hücumdan sonra Rusiya rəsmisinin konkret bir Qərb ölkəsini hədəfə alması baxımından ilk dəfədir. Paralel olaraq, Moskva şimal-qərb sərhədlərində hərbi fəallığını artırır: yeni bazalar yaradılır, hərbi texnika yerləşdirilir və Leninqrad Hərbi Dairəsi formalaşdırılır. Medvedev
sentyabrın 5-də sərhədə səfər edib, burada müdafiə qurğularının inşası planlarını açıqlayıb.

İqtisadi və diplomatik münasibətlərin çökməsi

Medvedev həmçinin Finlandiya ilə Rusiya arasında qarşılıqlı faydalı iqtisadi əlaqələrin tamamilə dağıldığını vurğulayıb. Onun sözlərinə görə, bu vəziyyətdən ən çox əziyyət çəkənlər "adi fin vətəndaşlarıdır". 2024-cü ildə iki ölkə arasındakı ticarət cəmi 1, 26 milyard avro təşkil edib, halbuki 2019-cu ildə bu rəqəm 13,5 milyard dollar olub.

Rusiya və Finlandiya sovet dövründə yüksək texnologiyalı avadanlıqların tədarükü, neft-kimya məhsulları, gəmiqayırma, metallurgiya və enerji sahələrində qarşılıqlı əməkdaşlıq edib. Lakin Medvedevin sözlərinə görə, Helsinkinin "amerikayönümlü marionet hökumətləri" sayəsində əməkdaşlığı "sanksiya məntiqi" ilə əvəz edib.

Tarixi kompensasiyalar və hərbi ultimatum

Medvedev Rusiyanın Finlandiyadan İkinci Dünya müharibəsi zamanı vurulan ziyanın ödənilməsini tələb edə biləcəyini də qeyd edib. Onun fikrincə, Finlandiyanın NATO-ya qoşulması Paris Sülh Müqaviləsi (1947) və 1992-ci il Rusiya-Finlandiya Əsas Müqaviləsi ilə əldə edilmiş razılaşmaların pozulması deməkdir. Bu, həm də ölkənin ərazisini Rusiya əleyhinə silahlı hücum üçün istifadə etməməyi nəzərdə tutur.

Rəsmi məlumatlara görə, 1947-ci ildə Finlandiya 300 milyon dollar miqdarında reparasiya ödəməli idi, 226,5 milyonunu ödəyib, qalan hissədən isə SSRİ könüllü imtina edib. Medvedev hesab edir ki, real zərərin həcmi 20 trilyon rubl təşkil edir və Finlandiyanın "antirusiya hərbi isteriyası" fonunda Moskvanın bu iddiası haqlıdır.

Beləliklə, Medvedevin çıxışları sərt ultimatumlar, tarixi hesablaşmalar və sərhəddə hərbi təzyiqlərlə Finlandiyanı Rusiya qarşısında riskli mövqedə qoyur. Bu retorika həm də Ukraynaya hücum zamanı istifadə olunan təbliğata çox bənzəyir - keçmişin "haqq-hesab" arqumentləri bugünkü siyasi gərginliyi gücləndirir.