"Şekspirin kəlləsini məzardan kim və niyə oğurlayıb?" - Arxeoloqlar cavab verir

"Arxeoloji tapıntılar yeni suallar doğurur..."

Arxeoloqlar hesab edir ki, tarixdə ən məşhur dramaturqlardan biri olan Uilyam Şekspirin kəlləsi onun məzarından oğurlanıb, baxmayaraq ki, məzarın üzərindəki "lənət" bu əməliyyatdan çəkindirməli idi.

Moderator.az xəbər verir ki, bu barədə "IFL Science" nəşri yazıb.

Şekspir 1616-cı ildə Stratford-upon-Avondakı Müqəddəs Üçlük kilsəsində dəfn edilib. Onun məzar daşında yazılmış şeir-lənət sümüklərinin hərəkət etdirilməsinə qarşı xəbərdarlıq edir: "Əziz dost, İsanın xatirinə, burada dəfn olunmuş külləri qazma. Bu daşları qoruyanın yolu xeyirlə dolu olsun, sümüklərimi narahat edən isə lənətlənmişdir".

Arxeoloqların sirli kəşfi

2016-cı ildə Staffordşir Universitetinin arxeoloqları Şekspirin məzarını georadar vasitəsilə skan edərkən müdaxilə əlamətləri aşkarlayıb. Uzun müddət Şekspir və həyat yoldaşı En Heteuey dərin bir yeraltı məzarda dəfn olunduğu düşünülüb, lakin araşdırmalar göstərib  ki, məzarlar nisbətən səthidir.

Araşdırmaya rəhbərlik edən arxeoloq Kevin Kolls qeyd edib ki, onlar Şekspirin başının olduğu yerdə qəribə bir pozuntu aşkar ediblər: "Əldə etdiyimiz bütün məlumatlarda aydın görünürdü ki, burada başqa bir şey baş verir. Material qazılıb, sonra yenidən basdırılıb. Məzarın başında çox qəribə bir kərpic strukturu tapdıq. Bu mənim üçün olduqca inandırıcıdır ki, Şekspirin kəlləsi Müqəddəs Üçlük kilsəsində yoxdur".

Qəribə nəzəriyyələr və əfsanələr

Şekspirin kəlləsinin oğurlanması uzun illərdir əfsanələrə və hekayələrə mövzu olub. 1879-cu ildə din xadimi Çarls Cons Lanqston "Şekspirin kəlləsi necə oğurlanıb" adlı hekayə yazıb və iddia olunub ki, təxminən 100 il əvvəl kəllə kilsəyə daxil olan quldurlar tərəfindən oğurlanıb.

Bəzi əfsanələr Şekspirin kəlləsinin Vusterşir qraflığındakı Beole kilsəsində olduğunu iddia edir. Lakin arxeoloqlar oradakı kəlləni lazer skanlama və məhkəmə-tibb analizindən keçirdikdə, onun təxminən 70 yaşında naməlum bir qadına aid olduğu məlum olub.

Beləliklə, arxeoloqların qənaətinə görə, Şekspirin kəlləsi həqiqətən yoxdur, amma harada olduğu və kimin əlinə keçdiyi hələ də bilinmir. Kevin Kolls qeyd edir: "Bardın məzarı haqqında o qədər çox ziddiyyətli mif və əfsanələr var ki, bu nəticələr illər boyunca yeni elmi müzakirələr və nəzəriyyələr doğuracaq".