"Almaniyada seçki öncəsi müəmmalı ölümlər: təsadüf, yoxsa şübhəli ardıcıllıq?"

"Şimali Reyn-Vestfaliyada yeddi AfD namizədinin ölümü cəmiyyətdə konspiroloji şayiələr doğurub, amma polis hər şeyi təsadüf kimi qiymətləndirir..."

Şimali Reyn-Vestfaliya əyalətində sentyabrın ortasında keçiriləcək yerli seçkilər ərəfəsində "Almaniya üçün Alternativ" (AfD) partiyasının yeddi nümayəndəsi bir-birinin ardınca dünyasını dəyişib. Son ölüm xəbəri sentyabrın 3-də yayılıb və bu ardıcıllıq dərhal sosial şəbəkələrdə "qəsdən qətl" ehtimalları ilə bağlı söz-söhbətləri alovlandırıb.

Moderator.az xəbər verir ki, bu barədə "Press.lv" məlumat yayıb.

Polisin mövqeyi: cinayət izi yoxdur

Alman polisi iddiaları qəti şəkildə rədd edir. Hüquq-mühafizə orqanlarının açıqlamasına görə, bütün hallarda "təbiət mənşəli ölüm" qeydə alınıb və yalnız ilk hadisədə - 59 yaşlı Volfqanq Zaytsın infarktdan qəfil ölümündə standart prosedur olaraq araşdırma aparılıb. Polis nəticə çıxarıb ki, heç bir zorakılıq əlaməti yoxdur.

Digər namizədlərin də ölümü rəsmi qurumlar tərəfindən təbii səbəblərlə izah olunur. AfD-nin Şimali Reyn-Vestfaliya şöbəsinin sədr müavini Kay Qotşalk da bütün bu hadisələri "təsadüf" adlandırır. Onun sözlərinə görə, hazırda mövcud məlumatlar "ən azı şübhələri təsdiqləmir" və dərhal "sui-qəsd nəzəriyyələrinə" qapılmaq düzgün olmaz.

Ölüm səbəbləri: infarkt, xroniki xəstəliklər və intihar

Məlumata görə, Stefan Berendesin (Bad-Lippşprinqe şəhərindən namizəd) və daha iki namizədin - Volfqanq Klinger və Ralf Langenin ölümü də "təbiidir". "Politico" yazır ki, Rene Herford xroniki qaraciyər xəstəliyi səbəbilə böyrək çatışmazlığından dünyasını dəyişib, 42 yaşlı Patrik Titse isə hələ
iyulun 1-də intihar edib. Sonuncu ölüm isə 80 yaşlı Hans-Yoaxim Kində aiddir, o, uzun sürən xəstəlikdən sonra həyatını itirib.

Digər partiyalarda da oxşar hallar

Seçki komissiyası "Bild" qəzetinə açıqlamasında bildirib ki, seçki kampaniyası dövründə yalnız AfD deyil, digər partiyalardan da ən azı altı namizəd ölüb. Onların arasında Heyvanların Müdafiəsi Partiyası, Azad Seçicilər, Azad Demokratlar və Müstəqil Seçici Birliyi nümayəndələri var. Komissiya rəsmisinin sözlərinə görə, "belə hallara təəssüf ki, hər seçkidə rast gəlinir və partiya mənsubiyyətindən asılı deyil".

Seçkilər və siyasi fon

Şimali Reyn-Vestfaliya Almaniyanın ən çox əhalisi olan əyalətidir (18 milyon nəfər) və burada 14 sentyabr seçkilərində təxminən 20 min namizəd mübarizə aparacaq. AfD son illərdə federal səviyyədə 16-17 faiz səs toplayaraq yüksəlişdə olsa da, 2022-ci ildə bu əyalətdə cəmi 5,4 faiz dəstək qazana bilib. Ölümlərin təsadüfi olub-olmaması barədə mübahisələr hələ səngiməsə də, həm polis, həm də yerli siyasətçilər seçki prosesinə etimadın qorunmasının vacibliyini vurğulayır.