"Müttəfiqlər Ukraynanın təhlükəsizliyi üçün konkret addımlar atmağa hazırdır" - Paris görüşünün yekunları

"Rusiyanın Ukrayna ərazisində hansı xarici qüvvələrin ola biləcəyi barədə qərar verməyə heç bir haqqı yoxdur..."

Parisdə keçirilən "İstəklilər koalisiyası"nın toplantısı Ukraynanın gələcək təhlükəsizliyinə dair yeni mərhələ açdı.

Moderator.az xəbər verir ki, bu barədə "currenttime.tv" nəşri məlumat yayıb.

Koalisiyanın möhkəmlənməsi

Məlumatda deyilir ki, müzakirələrin əsas mövzusu həm quruda, həm dənizdə, həm havada, həm də kiberməkanda təhlükəsizlik zəmanətlərinin təmin edilməsi olub. Ukrayna prezidenti Vladimir Zelenski 30 ölkənin iştirakı ilə baş tutan görüşdən sonra bildirib ki, bütün tərəflər "möhkəm sülh və davamlı təhlükəsizlik" arzusu ilə birləşib. O, əlavə edib ki, ən böyük zəmanət Ukraynanın güclü ordusudur və bu baxışda bütün müttəfiqlər birləşirlər.

Məhdudiyyətsiz dəstək

Fransa prezidenti Emmanuel Makron açıqlayıb ki, artıq 35 ölkə Ukraynaya təhlükəsizlik zəmanəti verməyə hazırdır. Onun sözlərinə görə, Ukrayna ordusunun ölçüsünə və imkanlarına heç bir məhdudiyyət qoyulmayacaq, əksinə, müttəfiqlər onun gücünü bərpa etmək və hər hansı gələcək təcavüzü önləmək üçün birgə fəaliyyət göstərəcəklər.

Makron xüsusi vurğulayıb ki, 26 ölkə ya sülhməramlı kontingent göndərməyə, ya da maliyyə ayıraraq Ukraynanın təhlükəsizliyini havada və dənizdə təmin etməyə razılıq verib. "Bu qüvvələr Rusiyaya qarşı müharibə aparmaq üçün deyil, sülhü qorumaq və yeni döyüşlərin qarşısını almaq üçün nəzərdə tutulub", - o, bildirib.

Uzaqmənzilli silahlar

Böyük Britaniyanın baş naziri Kir Starmer koalisiyanın Ukraynaya "sarsılmaz vəd" verdiyini bəyan edib. O, bəzi müttəfiqlərin artıq uzaqmənzilli raketlərin tədarükünə hazır olduqlarını açıqlayıb. Starmerin sözlərinə görə, Putinə etibar etmək mümkün deyil və Moskva məqsədli şəkildə danışıqları uzadır. Bu səbəbdən də Kiyevə əlavə silah dəstəyi zəruri hesab olunur. London Ukraynaya yeni nəsil ballistik raketlərin verilməsini də nəzərdən keçirir.

NATO-nun sərt mövqeyi

NATO baş katibi Mark Rütte isə Avropada keçirilən sammitdə kəskin mesaj verib: "Rusiyanın Ukrayna ərazisində hansı xarici qüvvələrin ola biləcəyi barədə qərar verməyə heç bir haqqı yoxdur. O, Avropanı Moskvanın fikirlərini həddindən artıq önəm verməməyə çağıraraq bildirib ki, Rusiya uzunmüddətli perspektivdə də "sabitliyi pozan və qarşıdurma yaradan" güc olaraq qalacaq. Buna görə də Avropanın müdafiə sənayesinin sürətləndirilmiş silah istehsalına keçməsi vacibdir.

Siyasi mənzərə

Görüş göstərdi ki, Qərb ölkələri artıq Ukraynanın təhlükəsizliyini təmin etmək üçün bəziləri maliyyə və silah dəstəyi ilə, bəziləri isə sülhməramlı qüvvələrlə konkret addımlar atmağa hazırdır. Zelenski xüsusi olaraq ABŞ prezidenti Donald Trampa təşəkkür edərək onun sülhün bərqərar olması uğrunda göstərdiyi səyləri qeyd edib.

Beləliklə, Paris görüşü Ukraynanın gələcəyi üçün yalnız bəyanat deyil, həm də faktiki fəaliyyət planı vəd edir. Müttəfiqlər açıq şəkildə göstər ki, bu müharibənin taleyini Ukrayna ilə birlikdə həll etmək niyyətindədirlər.