Ərdoğan Putin və Zelenskinin hələlik görüşə hazır olmadığını bildirib

“Rusiya Prezidenti Vladimir Putinlə ikitərəfli görüşümüz zamanı Rusiya-Ukrayna müharibəsini ədalətli sülh yolu ilə bitirmək üçün nə edilə biləcəyinə dair fikir mübadiləsi apardıq”.

Moderator.az xəbər verir ki, bu barədə Türkiyə Prezidenti Rəcəb Tayyib Ərdoğan bildirib.

Onun sözlərinə görə, bu görüşdə enerji əməkdaşlığı xüsusi müzakirə mövzusu olub.

Ərdoğan deyib ki, Türkiyə əvvəldən ardıcıl olaraq Rusiya-Ukrayna münaqişəsinin danışıqlar yolu ilə həll oluna biləcəyi mövqeyini qoruyub.

“İstanbuldakı danışıqlar bu yolun açıq olduğuna ən bariz sübutdur. Biz sülh ümidini konkret, həll yönümlü nəticələrə çevirməliyik. Bunun üçün biz rəhbərlik səviyyəsində bu məsələni həll etməliyik. Biz cənab Putinin son Alyaska sammitindən gəldiyi nəticəni və bu görüşlərlə bağlı fikirlərini təhlil etdik. Onun ABŞ Prezidenti Donald Trampla görüşü əhəmiyyətli idi.

Biz cənab Putinin bu məsələlərlə bağlı fikirlərini öyrənməyə çalışdıq, həmçinin Ukrayna Prezidenti Volodimir Zelenski ilə bir neçə telefon danışığı aparmışıq. Bu görüşlər zamanı cənab Zelenskinin cənab Putinə münasibətdə mövqeyini anlamaq imkanımız oldu.

Alyaska sammitinin nəticələrini yenidən nəzərdən keçirmək imkanımız da oldu. Mən həm cənab Zelenskinin, həm də cənab Putinin yanaşmalarını müsbət hesab edirəm. İstanbul prosesinin Türkiyədə davam etdirilməsi təşəbbüsünün mümkünlüyünü təklif edəndə o, “Niyə də olmasın?” deyə cavab verdi. Lakin onlar hələ buna hazır deyillər”.