"Avropa Trampın Ukrayna üzrə sülh səylərini sarsıdır" - Ağ Ev

"ABŞ və Avropa arasında Ukrayna üzrə diplomatik gərginlik dərinləşir..."

Ağ Ev son günlərdə Avropa liderlərinə qarşı narazılığını açıq şəkildə ifadə etməyə başlayıb. ABŞ administrasiyası hesab edir ki, bəzi Avropa dövlətləri prezident Donald Trampın Ukraynada müharibəni dayandırmaq səylərinə mane olur və Kiyevi "reallıqdan uzaq" tələblərə sürükləyir.

Moderator.az xəbər verir ki, bu barədə "The Telegraph" və "Axios" nəşrləri yazıb.

Vaşinqtonun əsas ittihamları

ABŞ rəsmilərinin sözlərinə görə, bir sıra Avropa liderləri ictimaiyyət qarşısında Trampın təşəbbüslərini dəstəkləsələr də, pərdəarxasında tam əks mövqe nümayiş etdirirlər. Onlar Ukraynadan Rusiya ilə danışıqlarda qeyri-real güzəştlər tələb edir, bununla da əldə olunmuş kiçik irəliləyişləri belə sıfırlayırlar.

Xüsusilə vurğulanır ki, Britaniya və Fransa daha konstruktiv yanaşma sərgiləyir, lakin digər böyük Avropa ölkələri ABŞ-ın bütün xərcləri öz üzərinə götürməsini istəyir. Ağ Ev rəsmilərindən biri bu vəziyyəti belə şərh edib: "Razılaşma əldə etmək mümkün olanın sənətidir. Amma bəzi avropalılar hələ də nağıllar aləmində yaşayır. Unudurlar ki, tango üçün iki nəfər lazımdır".

Trampın səbrinin tükənməsi

Mənbələr bildirir ki, prezident Tramp artıq ciddi şəkildə diplomatik təşəbbüslərdən geri çəkilməyi düşünür. Onun yaxın çevrəsi hesab edir ki, Avropa liderlərinin qeyri-konstruktiv davranışı və Zelenskidən maksimalist mövqe tələb etməsi prosesi dalana salıb. Ağ Evdə belə bir yanaşma da formalaşır: tərəflərdən heç olmasa biri daha çevik mövqe nümayiş etdirənədək gözləmək. "Qoy müəyyən qədər mübarizə aparsınlar, sonra baxarıq vəziyyət necə olacaq", - bir yüksək rütbəli amerikalı rəsmisi qeyd edib.

Ukraynanın mövqeyi və Vaşinqtonun tələbləri

Ukrayna prezidenti Vladimir Zelenski Rusiyanın son hücumlarından sonra bəyan edib ki, sadəcə siyasi açıqlamalar kifayət deyil, real addımlar atılmalıdır. Onun komandası isə Trampın xüsusi nümayəndəsi Stiv Uitkoffla görüşündə atəşkəsin dəqiq müddəti barədə danışıqlar aparıb. Digər tərəfdən, ABŞ Avropadan Rusiyaya qarşı daha sərt sanksiyalar tələb edir - enerji resurslarının tam qadağan olunması, həmçinin Hindistan və Çinə əlavə gömrük rüsumlarının tətbiqi gündəmdədir.

Avropa cavab verir

Avropalı rəsmilər isə Vaşinqtonun ittihamlarını əsassız hesab edir. Onların sözlərinə görə, ABŞ-ın təsvir etdiyi "ikili oyun" mövcud deyil və Avropa ölkələri artıq yeni sanksiya paketləri üzərində işləyir.

Oksford Universitetinin professoru Timoti Qarton Eş isə hesab edir ki, Putinin danışıqlara oturması yalnız Moskva üçün hərbi və iqtisadi şərtlərin dözülməz hala gəlməsindən sonra mümkün olacaq. Onun fikrincə, bu mərhələ yaxın aylarda deyil, ancaq gələn il gələ bilər.

ABŞ və Avropa arasında Ukrayna müharibəsinin sülh yolu ilə həlli məsələsində ciddi fikir ayrılığı yaranıb. Tramp administrasiyası Avropanı "xəyali tələblərlə" prosesi pozmaqda ittiham edir, Avropa isə öz növbəsində Vaşinqtonun yanaşmasını ədalətsiz sayır. Belə görünür ki, yaxın aylarda danışıqların taleyi tərəflərin kompromisə nə dərəcədə hazır olmasından asılı olacaq.