"Putin Ukrayna ilə bağlı planlarından imtina etməyəcək" - ISW

Bizi sosial şəbəkələrdən izləyin:

"Mövcud cəbbə xətti Ukraynanın Rusiya təcavüzündən etibarlı müdafiəsi üçün kifayət qədər strateji dərinlik təmin etmir..."

Kremlin Ukraynadan işğal olunmamış ərazilərini güzəştə getməyi tələb etməsi Rusiyanın bu ərazilərə iddialarına sadiq qaldığını göstərir.

Moderator.az xəbər verir ki, bu barədə Amerikanın Müharibənin Öyrənilməsi İnstitutunun (ISW) yeni hesabatında deyilir.

Hətta Ukraynada atəşkəs əldə olunsa belə, Rusiya diktatoru Vladimir Putin Ukraynaya qarşı ambisiyalarından əl çəkməyəcək. Rusiya ordusunun hücumlarının bərpası "demək olar ki, dərhal Xarkov, Zaporojye və Donetsk "qalalar zolağının" əsas şəhərlərinə təhdid yaradacaq".

Uoltsun ərazi güzəştləri ilə bağlı bəyanatı

Amerikalı mütəxəssislər ABŞ prezidentinin milli təhlükəsizlik üzrə müşaviri Mayk Uoltsun bəyanatına istinad edir. O, bildirib ki, Ukrayna qeyri-müəyyən təhlükəsizlik zəmanətləri müqabilində qeyri-müəyyən ərazi güzəştləri edə bilər. Onun sözlərinə görə, Vaşinqton Ukraynadakı müharibənin diplomatik danışıqlarla dayandırılması məsələsində real vəziyyəti nəzərə alır.

"Hazırkı vəziyyətin reallığı" ifadəsi ilə konkret olaraq nə nəzərdə tutulduğu aydın deyil. Hesabatda vurğulanır ki, Rusiya rəsmiləri tez-tez danışıqların "reallıqları nəzərə almalı olduğunu" bildirərək, hazırkı cəbhə xəttinə və döyüş meydanında Rusiya üçün qaçılmaz qələbələr iddiasına istinad edir.

ISW mütəxəssisləri hesab edir ki, Uoltsun Ukraynanın qeyri-müəyyən təhlükəsizlik zəmanətləri alacağını etiraf etməsi, ABŞ prezidenti Donald Trampın Ukraynada uzunmüddətli sülh təmin etmək məqsədinə çatmasının əsas aspektidir. Lakin döyüşlərin müdafiəsiz sərhədlər üzərində dayandırılması bu təhlükəsizlik zəmanətlərinin effektivliyini azalda bilər.

Hazırkı cəbhə xətti

Analitiklərə görə, mövcud cəbhə xətti Ukraynanın gələcəkdə Rusiya təcavüzündən etibarlı müdafiəsi üçün kifayət qədər strateji dərinlik təmin etmir.

"Rusiya qoşunları Dnepr çayının qarşı sahilində, Xersondan təxminən 25 km məsafədə, Zaporojyedən 25 km və Xarkovdan 30 km uzaqlıqdadır. Dneprdəki Rusiya qüvvələri atəşkəsdən çayı keçmək üçün hazırlıq görmək üçün istifadə edə bilər ki, bu da onların bu əməliyyatda uğur qazanma ehtimalını əhəmiyyətli dərəcədə artırır", - hesabatda deyilir.

Qeyd edilir ki, şaxtalı hava şəraitində genişmiqyaslı mexanikiləşdirilmiş hücumların dayanması müharibədə olduqca nadir hadisədir. Bu isə o deməkdir ki, Rusiya ordusunun yeni hücumu, çox güman ki, dərhal Xarkov, Zaporojye və Donetsk bölgəsinin əsas şəhərlərinə təhlükə yaradacaq.

Təcavüzkar Rusiya işğal altındakı Ukrayna ərazilərini Rusiyaya birləşdirən böyük avtomagistral və dəmir yolu inşa edir. Bu, Rusiyanın işğal olunmuş ərazilərə nəzarətini gücləndirəcək və gələcəkdə cənub istiqamətində yeni hücumlar üçün Rusiya qüvvələrinin təchizatını asanlaşdıracaq.

Qərb qüvvələrinin iştirakı və Ukraynaya dəstək

"Hazırkı cəbhə xəttinə yaxın atəşkəs xətləri müəyyən edilərsə, ABŞ və Avropa Ukraynaya daha sürətli, daha böyük və daha bahalı hərbi yardım göstərməli olacaq. Ukrayna, çox güman ki, Rusiya ilə sərhədi boyunca 2100 km-dən çox uzunluğu olan əraziləri qorumaq üçün daha böyük və daha imkanlı bir orduya ehtiyac duyacaq", - ISW ekspertləri vurğulayır.

Hazırkı cəbhə xətti boyunca atəşkəs rejiminə riayət olunması üçün Qərb qüvvələrinin geniş şəkildə cəlb olunması tələb ediləcək. Trampın ifadəsi ilə desək, Ukraynanın strateji əraziləri geri qaytarması gələcək sülhün təmin edilməsini daha ucuz və asan edə bilər.

Rusiyanın ərazi iddiaları qüvvədə qalır

Atəşkəsin daha müdafiəli mövqelərdə baş verməsi Rusiya ordusunu yeni hücumlara başlamaq baxımından daha əlverişsiz vəziyyətə sala bilər və bu da gələcəkdə Rusiyanın təcacüz ehtimalını azaldar. Bununla belə, Rusiya rəhbərliyi işğal altındakı və işğal olunmamış Ukrayna ərazilərinə qarşı maksimalist ərazi iddialarını davam etdirir.

Kreml rəsmiləri, o cümlədən "fürer" Putin Ukraynadan Donetsk, Luqansk, Zaporojye və Xerson vilayətlərinin tam şəkildə Rusiyaya verilməsini tələb edir. Bu tələblər son həftələrdə dəfələrlə təkrarlanıb. "Kremlin Ukraynadan işğal olunmamış əraziləri güzəştə getməyi tələb etməsi, Kremlin və Putinin bu ərazilərə iddialarına sadiq qaldığını göstərir", - ISW hesabatında vurğulanır.

Bundan əlavə, Putin Ukraynanın NATO-ya və ya hər hansı təhlükəsizlik blokuna qoşulmaq məqsədindən imtina etməsini, eləcə də xarici hərbi yardım təkliflərini rədd etməsini tələb edib. Rusiya xarici işlər naziri Sergey Lavrov isə Avropanın Ukraynada hər hansı sülhməramlı qüvvələr yerləşdirməsinə qarşı çıxıb və bunun müharibə kimi qiymətləndiriləcəyini bildirib.

ISW ekspertləri vurğulayır ki, Kremlin bu tələbləri nəzərə alındıqda, Putin atəşkəsdən sonra belə Ukraynaya qarşı ambisiyalarından əl çəkməyəcək.

Xatırladaq ki, "Financial Times" da Rusiya diktatoru Vladimir Putinin Ukrayna ilə bağlı məqsədlərindən əl çəkməyəcəyini yazıb. Kreml rəhbəri mətbuat konfransında atəşkəsin yalnız münaqişənin "əsas səbəblərini" həll edəcək yekun razılaşmaya gətirib çıxarmalı olduğunu bildirib.