"Rusiya - ABŞ xokkey matçı 2025-ci ildə buzları əridə bilər" - "Aydınlık Gazetesi"

Bizi sosial şəbəkələrdən izləyin:

"ABŞ və Rusiya münaqişə deyil, idman arenasında rəqabət aparmalıdır..."

Qərb uzun müddətdir ki, Rusiyanı böyük beynəlxalq idman yarışlarından- Olimpiya Oyunlarından və əsas dünya çempionatlarından uzaqlaşdırmağa çalışır. Bu, ciddi bir səhvdir. İdman, əslində, siyasi gərginliyi azaltmağa və xalqlar arasında qarşılıqlı anlaşmanı gücləndirməyə kömək edə bilər.

Moderator.az xəbər verir ki, bu barədə Türkiyənin "Aydınlık Gazetesi" nəşri yazıb.

İdman və siyasət: ayrılmaz tandem

Rusiya idmanının beynəlxalq arenadan uzaqlaşdırılması Ukrayna münaqişəsindən əvvəl də baş verin. Xüsusilə xokkey həm ABŞ-da, həm də Rusiyada çox populyardır, lakin rusiyalı oyunçular beynəlxalq turnirlərdə iştirakdan məhrum edilib. Əgər bu məhdudiyyət aradan qaldırılsa, 2025-ci ildə təşkil olunacaq bir oyun iki ölkə arasında münasibətlərin yumşalmasına töhfə verə bilərdi.

SSRİ və ABŞ arasında idman arenasında rəqabət uzun illər boyu davam edib. "Moskva-1980" Olimpiadasında ABŞ və müttəfiqləri SSRİ-nin Əfqanıstana qoşun yeritməsinə etiraz olaraq yarışları boykot edib. Dörd il sonra Sovet İttifaqı və onun tərəfdaşları "Los-Anceles-1984" Olimpiadasına eyni cür cavab verib. Bu meyl sonrakı onilliklərdə də davam edib və bu gün də idmanda siyasətin dominant rol oynadığı görünür.

2020-ci ildə Dünya Antidopinq Agentliyi (WADA) Rusiyanı dörd il müddətinə beynəlxalq yarışlardan kənarlaşdırıb. Nəticədə Rusiya idmançıları Olimpiya Oyunlarında neytral statusda- ölkə bayrağı və himni olmadan çıxış etməli olub. Ukrayna münaqişəsindən sonra isə Rusiya və müttəfiqi Belarus faktiki olaraq bir çox beynəlxalq yarışlardan kənarda qalıb.

Xokkey niyə istisna edilir?

Beynəlxalq Xokkey Federasiyası (IIHF) Rusiyanı 2025 və 2026-cı il xokkey üzrə dünya çempionatlarından uzaqlaşdırıb. Bunun rəsmi səbəbi təhlükəsizlik məsələləri kimi göstərilsə də, bu, haqlı suallar doğurur.

Rusiya Xokkey Federasiyasının xüsusi nümayəndəsi Pavel Bure haqlı olaraq bildirir ki, hazırda 50-dən çox rusiyalı xokkeyçi NHL-də oynayır və heç bir təhlükəsizlik problemi yoxdur. Bundan başqa, Rusiya idmançıları üzgüçülük, şahmat və digər idman növlərində beynəlxalq yarışlarda iştirak edir. O zaman niyə xokkey istisna olunur?

Xokkey təkcə bir idman növü deyil, o, Rusiya, ABŞ və Kanadada milli kimliyin ayrılmaz hissəsidir. Bu oyun illər boyu böyük siyasi və mədəni əhəmiyyət daşıyıb. Məsələn, 2015-ci ildə Rusiya və ABŞ xokkey yığmaları dünya çempionatının yarımfinalında qarşılaşıb və rusiyalılar 4:0 hesabı ilə qələbə qazanıb. Belə görüşlər təkcə idman mübarizəsi deyil, həm də beynəlxalq dialoq üçün bir platformadır.

Ümid işığı: Rusiyanın qayıdışı mümkündürmü?

Hal-hazırda Rusiyanın əsas xokkey yığması beynəlxalq yarışlarda iştirak edə bilmir. Lakin ölkə "Rusiya 25" adlı yeni bir komanda yaradıb. Məşhur məşqçi Roman Rotenberqin rəhbərliyi altında bu komanda yüksək səviyyəli oyun nümayiş etdirir və beynəlxalq səhnəyə çıxmağa hazırdır.

Pavel Bure IIHF-in qərarını məhkəməyə çıxarmağı planlaşdırır və vurğulayır ki, 2026-cı il Olimpiadasında Rusiya yığmasının iştirakı məsələsi IIHF deyil, Beynəlxalq Olimpiya Komitəsi (IOC) tərəfindən həll ediləcək. IIHF prezidenti Lüc Tardif də Rusiyanın beynəlxalq turnirlərə mümkün qayıdışı ilə bağlı nikbin açıqlamalar verib. O, bildirib ki, federasiya Rusiya və Belarusun xokkey yarışlarına qayıtmasını istəyir, lakin bu prosesdə risklərin minimuma endirilməsi əsas məqsəd olaraq qalır.

İdman divarlar yox, körpülər qurmalıdır

Rusiya beynəlxalq idmandan kənarlaşdırılmamaq üçün təkcə hüquqi mübarizə aparmamalıdır. Eyni zamanda, diplomatik səylər artırılmalı, Rusiyanın idmanda iştirakı ilə bağlı yanlış təsəvvürlər aradan qaldırılmalıdır.

İdmanın siyasiləşdirilməsi dünya birliyi üçün heç bir fayda vermir. Əksinə, idman dialoq və anlaşma üçün ideal bir platforma ola bilər. Xüsusilə xokkey kimi populyar bir idman növündə Rusiya və ABŞ komandalarının qarşılaşması təkcə idman mübarizəsi deyil, həm də iki xalqın yaxınlaşması üçün bir fürsət ola bilər. Belə bir oyun, sözün həm məcazi, həm də həqiqi mənasında buzları əridə bilər.