"Almaniyanı nasistlərin idarə etməsini istəmirəm..."

Bizi sosial şəbəkələrdən izləyin:

"Berlində on minlərlə insan Mers və AfD-nin birgə səsverməsinə etiraz edib, aksiya Brandenburq qapıları və Bundestaq yaxınlığında keçirilib..."

Almaniya polisi bildirib ki, təxminən 160 min nəfər Berlində keçirilən etiraz aksiyasına qatılıb. Onlar müxalif Xristian Demokratik İttifaqının (XDİ) ifrat sağçı "Almaniya üçün Alternativ" (AfD) partiyası ilə birlikdə sərt immiqrasiya islahatları layihəsinə səs verməsinə qarşı çıxıb.

Moderator.az xəbər verir ki, bu barədə "bbc.com" nəşri yazıb.

Məlumatda deyilir ki, bu nümayiş 23 fevral parlament seçkilərindən öncə keçirilib. Sorğulara görə, AfD seçkilərdən sonra Almaniyanın ikinci ən populyar partiyasına çevrilə bilər.

Etirazçılar Brandenburq qapıları və Bundestaqın yaxınlığında toplaşıb. Onların bəziləri plakatlar qaldıraraq "Biz AfD ilə əməkdaşlığa mane olacaq divar olacağıq" və "Mers, ayıbdır! Evə get!" kimi şüarlar səsləndirib.

Xəbər agentliklərinin məlumatına görə, XDİ və AfD-nin birgə səsverməsi Almaniya siyasətindəki əsas tabuların birini pozub. Çünki ənənəvi partiyalar adətən ifrat sağçılarla əməkdaşlıq etmir.

Yanvarın 31-də Bundestaqda keçirilən səsvermədə mübahisəli islahat layihəsi cəmi 12 səs fərqi ilə rədd edilib: 338 deputat lehinə, 350 deputat isə əleyhinə səs verib.

XDİ lideri Fridrix Mers gələcək Almaniya kansleri kimi görünsə də, bir həftə ərzində ikinci dəfə AfD-nin dəstəyindən yararlanmağa çalışıb.

Almaniyanın müxtəlif siyasi dairələri ifrat sağçılarla əməkdaşlıq ideyasını açıq şəkildə pisləyib.

Nümayiş iştirakçılarının fikirləri

Bir etirazçı jurnalistlərə bildirib: "Almaniyanı istər kiçik, istər böyük koalisiya tərəfdaşı kimi nasistlərin idarə etməsini istəmirəm. Ən yaxşısı vaxtında küçələrə çıxmaqdır."

Başqa bir nümayişçi isə qeyd edib: "Mənə elə gəlir ki, guya, mərkəzçi olanlar absurda gedərək sağa yönəlir və daha çox seçici qazanmağa ümid edir. Amma bu, siyasətdə adi haldır."

AfD nümayəndələri nasist ideologiyasını izlədiklərini dəfələrlə təkzib etsələr də, Almaniya xüsusi xidmət orqanları partiyanın bəzi üzvlərini sağçı ekstremistlər sırasına daxil edib.

AfD seçkilər öncəsi miqrantların deportasiyasını və Rusiya qazının yenidən alınmasını təklif edir

Jurnalistlərin yazdığına görə, Mers ümid edib ki, miqrasiya siyasətində daha sərt mövqe tutmaq onun partiyasına etiraz elektoratından dəstək qazandıracaq. Lakin uzunmüddətli perspektivdə bu strategiya XDİnin daha mülayim seçicilərini itirməsi riski yaradır.

Cümə günü keçirilən səsvermədə islahat layihəsi Sosial Demokrat Partiyası (SDP) da daxil olmaqla bütün digər fraksiyalar tərəfindən rədd edilib.

Kansler Olaf Şolts isə Mersin AfD-nin dəstəyinə arxalanmasını "bağışlanmaz səhv" adlandırıb. Bu arada AfD lideri Alisa Vaydel çərşənbə günü ənənəvi partiyaları AfD seçicilərinə hörmətsizlikdə ittiham edib.