"Ukraynada sülh həm Avropaya, həm də ABŞ-a baha başa gələcək" - "Die Welt"

Bizi sosial şəbəkələrdən izləyin:

"Donald Tramp neytral vasitəçi rolunda qalacağını düşünməklə səhv edir..."

Donald Trampın Ukraynada müharibədən sonrakı təhlükəsizlik zəmanətləri yükünü Avropanın üzərinə qoymaq cəhdlərinə baxmayaraq, ABŞ Kiyev və Moskva arasında sülhün bağlanması prosesində neytral vasitəçi rolunu oynamaqla kifayətlənə bilməyəcək.

Moderator.az xəbər verir ki, bu barədə NATO-nun keçmiş analitiki Mixael Rüle Almaniyanın "Die Welt" qəzetində müəllif məqaləsində yazıb. Məlumatı "24tv.ua" nəşri yayıb.

Trampın komandası tərəfindən əvvəlcədən təqdim edilən sülh planına əsasən, döyüş əməliyyatları cəbhə xətti boyunca dondurulmalı və bu xəttin monitorinqi üçün sülhməramlı qüvvələr yerləşdirilməlidir. Lakin bu planın ən problemli hissəsi məhz budur.

Rülenin hesablamalarına görə, 1200 kilometrlik cəbhə xəttinə nəzarət etmək üçün ən azı 50 000 sülhməramlı tələb olunacaq. Normal rotasiya qaydalarına əsasən, ümumilikdə bu missiya üçün 150 000 əsgərin ayrılması lazım gələcək.

Daha vacib məqam isə bu sülhməramlı qüvvələrin mandatı, yəni onların səlahiyyət və hüquqlarıdır. Onların kifayət qədər gücü və hüquqi əsası olmalıdır ki, tərəflərdən biri atəşkəsi pozarsa, müdaxilə edib tədbir görə bilsinlər.

Rüle bildirir ki, bu səbəbdən BMT sülhməramlılarının (adətən Banqladeş və Pakistan kimi Qlobal Cənub ölkələrindən olan qüvvələr) bu missiyada iştirak etməsi real deyil.

Analitikin fikrincə, belə qüvvələr nə Rusiya, nə də Ukrayna qoşunlarına müqavimət göstərə bilməz və göstərmək istəməzlər. Bu səbəbdən cəbhə xəttinə yalnız Qərb ölkələrinin hərbi qüvvələri nəzarət edə bilər.

Lakin Avropa ölkələri onlarən arxasında ABŞ-ən açıq dəstəyi olmazsa, belə bir missiyanı öz üzərinə götürməyə razı olmaz.

"Vaşinqtonun üstünlük verdiyi yanaşma, yəni yalnız ədalətli vasitəçi rolunda çıxış edib, Avropanı hərbi yük altına salmaq cəhdi sərt reallıq qarşısında iflasa uğrayacaq", - Rüle yazır.

Bununla belə, hətta ABŞ-ın iştirakı olsa belə, belə bir missiya böyük maliyyə xərcləri tələb edəcək və Qərbin buna razı olub-olmayacağı aydın deyil.

Digər tərəfdən, Budapeşt Memorandumundan acı təcrübə yaşamış Ukrayna da qeyri-müəyyən vədlərlə kifayətlənməyəcək və ən azı aparıcı Qərb dövlətlərindən konkret təhlükəsizlik zəmanətləri tələb edəcək.

Analitik vurğulayır ki, Ukraynadakı müharibənin sona çatması üçün hətta onlara müharibənin davam etməsi onun dayandırılmasından daha az məsrəfli görünürsə belə, ABŞ və Avropa birgə işləməyə məcburdur.