"Dünyanın sonunun necə olacağı ilə bağlı məxfi kitab qismən açıqlanıb" - "Daily Mail"

Bizi sosial şəbəkələrdən izləyin:

"Yer kürəsinin maqnit sahəsinin qəfil dəyişməsi güclü zəlzələ, sunami və iqlim dəyişikliklərinə səbəb olacaq və bütün sivilizasiyanın məhvinə gətirib çıxaracaq..."

Mərkəzi Kəşfiyyat İdarəsi (MKİ) ABŞ Hərbi-Hava Qüvvələrinin sabiq əməkdaşı və UFO təqdiqatçısı Çan Tomasın "Adəm və Həvva tarixi" adlı kitabını qismən məxfilikdən çıxararaq yayımlayıb.

Moderator.az xəbər verir ki, bu barədə "Daily Mail" nəşri yazıb.

1966-cı ildə yazılmış bu kitabda müəllif iddia edir ki, hər 6500 ildən bir Yer kürəsində İncildə qeyd olunan "Nuh tufanı" kimi bir fəlakət baş verir. Lakin kitabın qismən açıqlanmasına baxmayaraq, hələ də məxfi məqamlar mövcuddur və tam mətn MKİ arxivlərində saxlanılır.

Tomas öz kitabında hətta ən məlumatlı oxucuları belə təəccübləndirə biləcək bir neçə əsas mövzuya toxunur. Ən şokedici bəyanatlardan biri onun fəlakətlərin dövri xarakter daşıması ilə bağlı iddiasıdır.

O, bu fəlakətlərin hər 6500 ildən bir baş verdiyini və bunu sübut etmək üçün İncildə qeyd olunan "Böyük tufan"ı misal göstərir. Tomasın sözlərinə görə, bu hadisə uydurma deyil, təxminən 6500 il əvvəl baş vermiş tarixi faktdır. O, həmçinin bu nəzəriyyəni təsdiqləyən arxeoloji və geoloji sübutların olduğunu qeyd edir.

Amma nəzəriyyənin ən maraqlı tərəfi Tomasın növbəti fəlakət barədə verdiyi proqnozdur. O, Yer kürəsinin maqnit sahəsinin qəfil dəyişə biləcəyini və bunun qlobal fəlakətlərə səbəb olacağını iddia edir. Tomas inanır ki, bu, güclü zəlzələlər, sunamilər və iqlim dəyişiklikləri ilə müşayiət olunaraq, demək olar ki, bütün sivilizasiyanın məhv olmasına gətirib çıxaracaq.

Tomasın təsvirlərinə görə, fəlakət Kaliforniyadan başlayacaq: dağlar "titrəyəcək", Sakit okean geri çəkilərək iki mildən hündür dalğa yaradacaq. Bu kataklizm Şimali Amerika qitəsini bürüyəcək və bütün dünyada fəsadlar törədəcək. O, həmçinin qeyd edir ki, fəlakətdən bir neçə gün sonra hər şey dəyişəcək: Benqal körfəzi Şimal qütbünə, Sakit okean isə Cənub qütbünə çevriləcək, bu da buzlaqların sürətlə əriməsinə səbəb olacaq.

Buna baxmayaraq, elmi ictimaiyyət Tomasın nəzəriyyələrinə ehtiyatla yanaşır. NASA-nın baş elmi işçisi Martin Mlinçak qeyd edir ki, maqnit sahəsinin qəfil dəyişərək apokalipsisə səbəb ola biləcəyi barədə heç bir elmi sübut yoxdur. O, bildirir ki, maqnit sahəsinin dəyişməsi prosesi həqiqətən mövcuddur, lakin Tomasın təsvir etdiyi kimi qlobal fəlakətlər yaratmır.

Üstəlik, əgər Tomasın yazdıqlarına inansaq belə, sual yaranır: niyə MKİ bu sənədi bu qədər uzun müddət gizli saxlayıb? Mümkün səbəblərdən biri əhali arasında təlaş yaratmaq və ya hökumətin gizli araşdırmalarının detallarını ifşa etmək qorxusu ola bilər.

Tomas həmçinin bu fəlakətin istənilən an baş verə biləcəyini iddia edir və planetimizi gözləyən fövqəladə dəyişikliklər barədə xəbərdarlıq edir. Lakin əksər alimlər bu nəzəriyyələri elmi sübutlardan məhrum olduğu üçün fantaziya hesab edir.

Ümumilikdə, Çan Tomasın nəzəriyyəsi mübahisəlidir. O, maraqlı fikirlər irəli sürsə də, əksər alimlər onun proqnozlarına skeptik yanaşır və onları qeyri-elmi və faktlarla təsdiqlənməmiş hesab edir.