Putin Ukraynanın NATO üzvlüyü məsələsində güzəştə getməyə hazırdır?

Bizi sosial şəbəkələrdən izləyin:

"Tramp bu şərtləri məqbul hesab etsə belə, Avropanın Polşa və Çexiya kimi ölkələrinin bunu dəstəkləməsi ehtimalı azdır..."

Araşdırmaçı jurnalist Xristo Qrozev bildirib ki, Putin Ukraynanın NATO-ya üzv olmasına Şərqi Avropadan ABŞ bazalarının çıxarılması müqabilində razılaşa bilər.

Moderator.az xəbər verir ki, bu barədə o, Ukraynanın "24 kanal" nəşrinə müsahibəsində bəyan edib. Məlumatı "dualog.ua" nəşri yayıb.

O, həmçinin Kremlin hazırkı sərt mövqeyinin yalnız danışıqlar taktikası olduğunu güman edir.

Qrozev qeyd edib ki, Putin ABŞ-ın qarşıdakı ultimatumundan xəbərdardır və Donald Trampa Ukraynanın NATO-ya üzvlüyünü hər hansı bir danışıqlardan çıxarmaq üçün təzyiq göstərməyə çalışır.

Onun fikrincə, Putinin hazırkı mövqeyi, çox güman ki, Moskvanın yekun mövqeyi deyil. O, izah edib ki, Tramp prezident seçilməmişdən öncə dəfələrlə Ukraynadakı müharibəni dayandırmağa hazır olduğunu bildirib.

Lakin prezident seçkilərində qələbə qazandıqdan sonra Tramp daha balanslı mövqe nümayiş etdirib və çox güman ki, Putinlə razılığa gəlməyin çətin olacağını başa düşüb. Jurnalist qeyd edib ki, Putin təklifləri ardıcıl olaraq rədd edir və bu, mürəkkəb danışıqlar prosesinə işarə edir.

Qrozev güman edir ki, Tramp münaqişənin müvəqqəti dondurulmasını, xüsusilə Ukraynanın NATO-ya üzvlüyünün təxirə salınmasını təklif edə bilər. Lakin Putin açıq şəkildə bəyan edib ki, belə bir qərarı hətta uzunmüddətli perspektivdə, beş və ya iyirmi il ərzində də qəbul etməyəcək.

Bununla belə, jurnalist xəbərdarlıq edir ki, Putinin bəyanatlarını tamamilə doğru qəbul etmək olmaz, çünki bu bəyanatlar, çox güman ki, Rusiyanın Tramp ilə danışıqlarda mövqeyini gücləndirmək məqsədi daşıyır.

Eyni zamanda, Qrozevin istinad etdiyi mənbələr Kremlin müəyyən şərtlər daxilində Ukraynanın NATO-ya üzvlüyünə razılaşa biləcəyini ehtimal edir. Bu şərtlər arasında Şərqi Avropadakı Amerika bazalarının çıxarılması və Rusiyaya qarşı sanksiyaların qismən aradan qaldırılması var.

Belə güzəştlər Rusiyaya iqtisadi təzyiqləri azaltmağa və beynəlxalq təcriddən çıxmaq istəyən Rusiya elitası arasında narazılığı azaltmağa kömək edə bilər. Jurnalist qeyd edir ki, hətta Tramp bu şərtləri məqbul hesab etsə belə, onları, məsələn, Polşa və ya Çexiya kimi Şərqi Avropa ölkələrinin dəstəkləməsi ehtimalı azdır.

Qrozev son olaraq qeyd edib ki, Kremlin strategiyası, çox güman ki, Ukraynanın NATO-ya üzvlüyünə dair mübahisəli məsələdə güzəştlərə hazır görünərək, uzunmüddətli üstünlüklər əldə etmək üçün danışıqlardan istifadə etməyə yönəlib.

Bundan öncə xəbər verildiyi kimi, Putin bildirib ki, 2021-ci ildə Bayden Ukraynanın NATO-ya üzvlüyünü 10-15 il təxirə salmağı təklif edib. Rusiya diktatoru isə cavabında qeyd edib ki, Rusiya üçün bunun indi və ya 10 ildən sonra baş verməsinin fərqi yoxdur.