"Bayden Prezident Azadlıq medallarını təqdim edib" - "Amerikanın Səsi"

Bizi sosial şəbəkələrdən izləyin:

Vəzifəsini tərk etməyə hazırlaşan ABŞ prezidenti Co Bayden Prezident Azadlıq medallarını 19 laureata təqdim edib.

Moderator.az xəbər verir ki, bu barədə "golosameriki.com" nəşri yazıb.

Azadlıq medalı ABŞ-da mülki şəxslər üçün iki ən yüksək mükafatdan biridir. Bu mükafat ABŞ-ın milli maraqlarının təhlükəsizliyi və müdafiəsinə, planetdə sülhün qorunmasına, eləcə də ABŞ və dünyanın ictimai və mədəni həyatına əhəmiyyətli töhfələr verən insanlara təqdim olunur.

Adətən, bu medal ABŞ prezidenti tərəfindən 4 iyul-ABŞ-ın Müstəqillik Günündə təqdim edilir. Lakin son dövrlərdə demokratlar bu ənənəni öz vəzifə müddətlərinin sonuna yaxın xatırlamağa üstünlük verir.

Azadlıq medalı, əsasən, amerikalılara təqdim edilsə də, bəzən istisnalar da olur. Bu dəfə Bayden siyasətçilər, ictimai xadimlər, yazıçılar, alimlər və idmançıları seçib.

Bayden mükafatı ABŞ-ın keçmiş prezidenti Bill Klintonun həyat yoldaşı, Barak Obamanın prezidentliyi dövründə dövlət katibi vəzifəsini tutmuş, həmçinin 2016-cı ildə prezidentliyə namizəd olmuş Hillari Klintona təqdim etməyə qərar verib.

Açıqlamada deyilir ki, "Dövlət katibi Klinton uzun illər dövlət qulluğunda çalışaraq, o cümlədən ABŞ Senatına seçilmiş ilk birinci xanım kimi dəfələrlə tarix yazıb. Dövlət katibi vəzifəsində işlədikdən sonra o, ABŞ-ın böyük siyasi partiyası tərəfindən prezidentliyə namizəd göstərilən ilk qadın olub".

Medalı həmçinin macar əsilli yəhudi amerikalı milyardçı Corc Soros (Dyerd Şvarts) alıb. 2021-ci ildə Soros demokratlara 128 milyon dollar ianə verib. 2024-cü ildə isə o, Demokratik Siyasi Fəaliyyət Komitəsinə (PAC) 60 milyon dollar bağışlayıb ki, bu qurum əsasən Demokrat Partiyasının ifrat-sol qanadının maliyyələşdirilməsi ilə məşğuldur.

Sorosun "Açıq Cəmiyyət Fondu" birbaşa Co Bayden üçün vəsait toplamaqla məşğul olan siyasi təşkilatlar arasında olub. Ağ Evin açıqlamasında qeyd edir ki, "Soros 120-dən çox ölkədə fondlar, tərəfdaşlar və layihələr şəbəkəsi vasitəsilə demokratiyanı, insan haqlarını, təhsili və sosial ədaləti gücləndirən qlobal təşəbbüslərə diqqət yetirib". 94 yaşlı Sorosun medalını onun oğlu Aleks qəbul edib.

Digər sahələrdə mükafat alanlar arasında məşhur aktyor Maykl C. Foks (əsasən "Gələcəyə Qayıdış" trilogiyası ilə tanınır), "Vogue" jurnalının baş redaktoru Anna Vintur, aktyor Denzel Vaşinqton, rejissor və ssenarist oğul Corc Stiven, investor və xeyriyyəçi Devid Rubenşteyn, televiziya aparıcısı Bill Nay, modelyer Ralf Loren (Ralf Lifşits), "Meycik" ləqəbli basketbolçu İrvin Conson, U2 qrupunun solisti Bono, "Dünya Mərkəzi Mətbəxi" təşkilatının qurucusu aşbaz Xose Andres, argentinalı futbolçu Lionel Messi və başqaları var.

Qeyd edək ki, 17 yanvar 2017-ci ildə prezidentliyi dövrünün sonuna yaxın, Barak Obama Azadlıq medalını o zamankı vitse-prezident Co Baydenə təqdim edib.

Xatırladaq ki, Prezident Azadlıq medalı (ing. Presidential Medal of Freedom) Amerika Birləşmiş Ştatlarının prezidenti tərəfindən vətəndaşlara təqdim edilən iki ən yüksək mükafatdan biri.

Medal 1945-ci ildə ABŞ-ın 33-cü prezidenti Harri Trumen tərəfindən İkinci dünya müharibəsində xidmətlərə görə təltif edilmək üçün təsis edilib.