Macarıstanın baş naziri Viktor Orban "Şimal axını" qaz kəmərlərində partlayışlarda ABŞ-ı ittiham edib.

 

Moderator.az xəbər verir ki, bu barədə Viktor Orban Rumıniyada Tuşvanyoş yay düşərgəsində çıxışı zamanı bəyan edib. Məlumatı "Yevropeyskaya pravda" nəşri yayıb.

 

Onun sözlərinə görə, bunun "Amerikanın rəhbərliyi altında törədilən terror aktı olduğu aydındır".

 

Baş nazir hesab edir ki, Avropa siyasəti iflasa uğrayıb və qitə öz maraqlarını daha qoruya bilmir.

 

"Biz "Şimal axını" qaz kəmərinin partladılması barədə susuruq, Almaniyanın özü  açıq-aşkar Amerikanın rəhbərliyi altında onun mülkiyyətinə qarşı törədilən terror aktı barədə susur.

 

Biz bu məsələni araşdırmırıq, onu aydınlaşdırmağa cəhd göstərmirik və hüquqi müstəvidə qaldırmırıq. Eynilə Danimarkanın köməyilə Angela Merkelin dinlənilməsi ilə bağlı düzgün hərəkət etməmişik, bu, itaətkarlıqdan başqa bir şey deyil", - Orban iddia edib.

 

 

"Şimal axını" Baltik dənizindən Almaniyaya çəkilən qaz kəmərləridir. Xəbər verildiyi kimi, "Şimal axını-1" qaz kəmərinin hər iki xətti, habelə "Şimal axını-2" qaz kəmərinin iki xəttindən biri 2022-ci il partladılıb. 

 

Rusiya və Qərb bir-birini ittiham etsə də, hər biri bunda əli olduğunu inkar edir.

 

2024-cü ilin fevralında İsveç prokurorluğu "Şimal axını" qaz kəmərlərində partlayışlar üzrə ilkin tədqiqatı dayandırıb. 

 

Tədqiqatın gəldiyi nəticə bundan ibarətdir ki, bu işdə İsveç yurisdiksiyası yoxdur, ona görə də tədqiqat dayandırılmalıdır. 

 

Sonradan Danimarka bilavasitə öz ərazi sularının yanında törədilən bu partlayışların tədqiqatından imtina edib. 

 

"Strategiya XXI" Qlobalistika Mərkəzinin prezidenti Mixail Qonçar hesab edir ki, Qərb Rusiyanın "Şimal axını" qaz kəmərində partlayışın tədqiqatını başa çatdırıb, lakin onu açıqlamağa tələsmir.

 

"Hər şey kifayət qədər tez bir zamanda aydınlaşıb. Lakin Ukrayna ilə münasibətlərin korlanmaması üçün nəticələr açıqlanmır. 

 

Bunun Rusiyanın etdiyi faktı varsa, qətiyyətli addımlar atmaq lazımdır. Burada artıq sadə bəyanatlarla keçinmək mümkün deyil", - Qonçar qeyd edib.