Kiyevdə son vəziyyət: 100-dən çox ailə evsiz qaldı, yenidən güclü hava hücumu gözlənilir...

Rusiya ordusu Yeni il gecəsi Ukraynaya genişmiqyaslı hücum edib, Kiyevdə hava hücumundan müdafiə sistemi işə salınıb. Rusiya qoşunları Ukraynaya 31 raket və 12 aviasiya endirib. Bundan başqa, reaktiv yaylım atəş sistemi ilə 70-dən artıq atəş açılıb. Hücum nəticəsində Çerniqov, Sum, Kiyev, Xmelnitski, Donetsk, Nikolayev və Xerson vilayətlərində mülki infrastruktura ziyan dəyib.

Bəs görəsən bu gün Ukraynada son vəziyyət necədir?

Oradakı vəziyyəti hazırda Kiyevdə olan azərbaycanlı jurnalist Mübariz Aslanov Moderator.az-a şərh etdi. Bildirdi ki, Kiyevdə 2 ilə yaxındır müharibə şəraiti görən əhali buna artıq vərdiş edib:

“Ötən gecə Kiyevdə sakit keçdi, əvvəlki günlərdən fərqli olaraq. Amma Sumı vilayətini (bu döyüşlər gedən ərazilərdən kənar vilayətlərdir) yenə vurdular. Kiyevdə ötən gün endirilən hava zərbələri nəticəsində bəzi məhəllələrdə su və işığın verilməsində problemlər oldu, onu da təmir edirlər. Əhali elə də təlaş içində deyil, 2 ilə yaxındır müharibə şəraiti artıq hər gün endirilən zərbələrə vərdiş etdirib. Amma təbii ki narahatlıq var. Elə təkcə dünən təxminən 100-dən çox ailə Kiyevdə evsiz qaldı. Hələ mən Xarkov, Dnepropetrovsk, Xerson, Sumı, Çerniqov, qərbdən Lvov vilayətlərində dağılan evləri demirəm. Bu təkcə bir gündə olanlardır. Nəzərə alsaq ki hər gün davam edir. Ötən gün axşam Ukrayna ordusu qarşı tərəfə məxsus bir zenit raket kompleksini məhv etdiyini açıqladı. Hansı ki (deyilənə görə) bu kompleks ötən gün Ukraynaya hücumda istifadə olunub. Ukrayna hazırda Krımda və Belqradda Rusiyaya zərbələr endirdiyi barədə bu gün səhərdən yerli mətbuatda xəbərlər yayılır. Eyni zamanda ötən gün axşam prezident Zelenski xalqa müraciət edərək çağırış etdi ki, hava həyəcan siqnallarını bu günlərdə mütləq iqnor etməsinlər, dərhal sığınacaqlara getsinlər. Gözlənilir ki, yəqin qarşı tərəfdən yenidən güclü hava hücumu olacaq. Ötən gün axşam Çerniqov vilayəti (bu, Ukraynanın şimal-qərbdən Belarus və Rusiya ilə sərhədidir)hərbi administrasiyasının rəhbəri bəyan etdi ki Rusiya ordusunun yenidən bu vilayətə hücum edib tutmağa cəhd etmə ehtimalı var. Bu, 2022-ci ilin martın sonunda Kiyev vilayəti də daxil bu vilayətlərin azad olunmasından sonra ikinci cəhd ola bilər. 

Vəziyyət belə davam edir”.