Yaponiya əhalisinin sayı ilk dəfə bütün 47 prefekturada azalıb

Yaponiyada yaşayan ölkə vətəndaşlarının sayı 14 il dalbadal azalır, orada daimi yaşayan əcnəbilərin sayı sürətlə artır.

Bu barədə Yaponiya İnzibati İşlər və Kommunikasiya Nazirliyi məlumat yayıb.

2023-cü il yanvarın 1-nə Yaponiyada 122,42 milyon vətəndaş yaşayırdı ki, bu da bir il əvvəlkindən təxminən 800 min nəfər azdır. Eyni zamanda, göstəricinin azalması bütün 47 prefekturada qeydə alınıb ki, bu da hakimiyyət orqanlarının belə statistika aparmağa başladığı 1968-ci ildən bəri ilk dəfə baş verib.

2022-ci ildə ölkədə 771,8 min yapon doğulub ki, bu da 1979-cu ildən bəri ən aşağı göstəricidir. Eyni zamanda, ölənlərin sayı rekord həddə - 1,56 milyon nəfərə çatıb.

2023-cü ilin yanvar ayına olan məlumata görə, əcnəbilər də daxil olmaqla Yaponiyanın ümumi əhalisi 125,4 milyon nəfər təşkil edir ki, bu da ötən illə müqayisədə 511 min nəfər azdır. Yaponiyada daimi yaşayan əcnəbi rezidentlərin sayı son üç ildə 10%-dən çox artaraq 2,99 milyon nəfərə çatıb ki, bu da 2013-cü ildə bu cür statistikanın başladığından bəri ən yüksək göstəricidir.