"Agentstvo": Vyanada 20 Rusiya diplomatı xüsusi xidmətlərlə bağlıdır

Rusiyanın Avstriyadakı diplomatik nümayəndəliklərində çalışan hər altıncı əməkdaşın birbaşa və ya dolayı yolla Rusiya xüsusi xidmət orqanları – SVR, GRU və FSB ilə əlaqəsi var.

Moderator.az xəbər verir ki, bu barədə "Agentstvo" nəşri məlumat yayıb.

Avqustun 10-da yayılan məlumata görə, Avstriyada Rusiya diplomatik nümayəndəliklərində çalışan 117 nəfərdən ən azı 20-si xüsusi xidmətlərlə bağlıdır və ya bağlı ola bilər. Jurnalistlər bu nəticəyə Rupep adlı açıq məlumat bazasını və Avstriya XİN saytında dərc olunan Rusiya diplomatlarının siyahısını təhlil edərək gəliblər.

Rusiya səfirliyində 8 nəfərin əlaqəsi

"Agentstvo"nun hesablamalarına görə, Avstriyadakı Rusiya səfirliyinin 48 əməkdaşından ən azı səkkiz nəfərin xüsusi xidmətlərlə əlaqəsi ehtimal olunur. Onlardan üçü Xarici Kəşfiyyat Xidməti (SVR), üçü Baş Qərargahın Baş İdarəsi (GRU), biri həm SVR, həm də GRU, biri isə Federal Təhlükəsizlik Xidməti (FSB) ilə bağlıdır. Bu ilin yayına qədər Avstriyada işləyən daha bir diplomat isə Rusiya Daxili İşlər Nazirliyinin əməkdaşı olub.

Xüsusi xidmətlərlə əlaqələr həmçinin Avropada Təhlükəsizlik və Əməkdaşlıq Təşkilatı (ATƏT) yanında Rusiya daimi nümayəndəliyinin 22 əməkdaşından yeddisində, eləcə də Avstriyada yerləşən digər beynəlxalq təşkilatlarda – Beynəlxalq Atom Enerjisi Agentliyi (MAQATE) və BMT qurumlarında çalışan 47 rus diplomatından beşində aşkar edilib.

Avstriya 2022-ci ildən bəri 14 rus diplomatı ölkədən çıxarıb

Nəşr qeyd edir ki, hesablamalara yalnız rəsmi dərc olunmuş diplomat siyahısı daxildir, inzibati və texniki əməkdaşlar nəzərə alınmayıb. Aşkar edilən əlaqələrin bir hissəsi əvvəlki iş yerləri ilə təsdiqlənir, digərləri isə qeydiyyat ünvanları, qohumlar və digər dolayı göstəricilərə əsaslanır.

Vyana Avropada Rusiya kəşfiyyat fəaliyyətinin əsas mərkəzlərindən biri sayılır. 2026-cı ilin mayında Avstriya hakimiyyəti kəşfiyyat məqsədilə dinləmə təşkil etməkdə şübhəli bilinən üç rus diplomatını ölkədən çıxarıb. Rusiyanın Ukraynaya qarşı müharibəsinin başlanmasından bəri Avstriya ümumilikdə 14 rus diplomatını ölkədən qovub. Bu barədə ORF tele-radio şirkəti məlumat verib. Eyni addımlar həmin dövrdə digər Avropa ölkələri tərəfindən də atılıb.