"Ukrayna Kinburn burnuna ilk dəfə silahlı robot çıxardı: dünyada analoqu olmayan əməliyyat keçirildi" - Ukrayna KİV-ləri

Ukrayna hərbçiləri işğal altında olan Kinburn burnunda dünyada ilk dəfə yeni formatlı döyüş əməliyyatı həyata keçirib.

Moderator.az xəbər verir ki, bu barədə Ukrayna Silahlı Qüvvələrinin 123-cü Ərazi Müdafiə Briqadası məlumat verib. Məlumatı "censor.net" nəşri yayıb. 

Robot döyüş tapşırığını yerinə yetirdi

Məlumatda deyilir ki, əməliyyat zamanı silahlı yerüstü robot kompleksi pilotsuz dəniz platforması vasitəsilə sahilə çatdırılıb və döyüş tapşırığını yerinə yetirib. Yayımlanan görüntülərdə pilotsuz dəniz platformasının silahlı robotu sahilə çıxardığı, daha sonra isə robotun irəliləyərək düşmən mövqelərinə atəş açdığı əks olunub. 

Briqadanın məlumatına görə, bu, sadəcə texnoloji sınaq deyil, insanın həyatını riskə atmadan döyüş tapşırıqlarının yerinə yetirilməsinə əsaslanan yeni müharibə yanaşmasının nümayişidir.

Robotlardan istifadə genişlənir

Ukrayna Müdafiə Nazirliyinin məlumatına əsasən, 2026-cı ilin əvvəlindən yerüstü robot kompleksləri 66 mindən çox logistika və təxliyə əməliyyatı yerinə yetirib. Təkcə iyun ayında bu cür missiyaların sayı 16 676-ya çatıb ki, bu da yanvar ayı ilə müqayisədə 122 faiz çoxdur.

Bundan əlavə, Ukraynanın "Brave 1" müdafiə klasteri yalnız hərbi məqsədlər üçün nəzərdə tutulan ikiayaqlı humanoid robotların hazırlanmasına qrant proqramı elan edib. Bununla da Ukrayna döyüş humanoid robotlarının inkişafını ayrıca müdafiə istiqaməti kimi maliyyələşdirən ilk ölkələrdən biri olub.