"ABŞ İranda növbəti zərbələri endirdi: hədəfdə Xameneinin dəfn mərasimi olub" - "Financial Times"

ABŞ ilə İran arasında gərginlik yenidən kəskinləşib. Vaşinqtonun son hava zərbələri yalnız hərbi obyektləri deyil, həm də mühüm nəqliyyat infrastrukturunu hədəfə alıb. Tehran hesab edir ki, məqsəd milyonlarla insanın Ayətullah Əli Xameneinin dəfn mərasiminə qatılmasının qarşısını almaq olub.

Moderator.az xəbər verir ki, bu barədə "Financial Times" nəşri yazıb.

Dəfn mərasiminə gedən yollar vuruldu

Məlumata görə, ABŞ Məşhəd şəhərinə gedən dəmir yolu körpülərinə bir neçə zərbə endirib. Nəticədə Tehran və  ölkənin cənub şəhərlərindən Məşhədə sərnişin qatarlarının hərəkəti pozulub. İran Xarici İşlər Nazirliyi bunu açıq təxribat adlandıraraq bildirib ki, Vaşinqton iranlıların vətənpərvərlik hissini və inqilab ideallarına bağlılığını anlamır. Zərbələr ABŞ ilə İran arasında Hörmüz boğazı ətrafında yaranmış yeni gərginlik fonunda baş verib. ABŞ prezidenti Tramp isə əvvəl elan olunmuş kövrək atəşkəsin artıq qüvvədə olmadığını bildirib.

Yeni zərbələr və İranın cavabı

İranın məlumatına görə, Qolestan əyalətindəki mühüm dəmir yolu körpüsü qanadlı raketlərlə vurulub. Həmin xətt İranın Türkmənistan və Qazaxıstanla beynəlxalq yük və sərnişin daşımalarında əsas marşrutlardan biridir. Bundan başqa, ölkənin cənub-şərqində elektrik infrastrukturu da hücuma məruz qalıb, bir neçə yüksək gərginlik xətti sıradan çıxıb və bəzi rayonlarda elektrik kəsilib.

ABŞ Mərkəzi Komandanlığı (CENTCOM) isə bildirib ki, təxminən 90 hərbi hədəf vurulub və məqsəd İranın Hörmüz boğazında kommersiya gəmilərinə hücum imkanlarını zəiflətməkdir. Tehran buna cavab olaraq Küveyt,  Bəhreyn və Qətərdəki ABŞ hərbi bazalarına raket və pilotsuz aparatlarla zərbələr endirdiyini açıqlayıb.

Qarşıdurma yenidən böyüyür

Məşhəddə Xameneinin dəfn mərasiminə minlərlə tərəfdar toplaşıb. İran rəsmiləri və mərasim iştirakçıları hesab edirlər ki, dəmir yoluna hücum insanların mərasimdə iştirakını azaltmaq və diqqəti izdihamdan yayındırmaq məqsədi daşıyıb. İran Dəmir Yolları zədələnmiş xətlərin bərpası üzərində iş aparıldığını bildirib. Yerli sahibkarların sözlərinə görə, bu marşrut son qarşıdurma dövründə İran limanlarının blokadasını qismən kompensasiya etmək üçün də istifadə olunurdu.

Bu arada İran Səhiyyə Nazirliyi son iki gün ərzində ABŞ zərbələri nəticəsində azı 14 nəfərin həlak olduğunu, 80-ə yaxın insanın yaralandığını açıqlayıb. Tehran Vaşinqtonu atəşkəs razılaşmasını pozmaqda ittiham edir. ABŞ isə İranın Hörmüz boğazında gəmilərə hücumlarını əsas gətirərək əməliyyatların davam etdirildiyini bildirir. Beləliklə, tərəflər arasında əldə olunmuş razılaşma faktiki olaraq yenidən iflasa uğrayıb.