“Qadının Gücü və Dəyəri: Psixoloq Baxışı ilə 8 Mart” – psixoloq Nuranə Şahin

Hər il qeyd olunan Beynəlxalq Qadınlar Günü yalnız qadınlara gül hədiyyə edilən bir gün deyil. Bu gün qadının cəmiyyətdəki rolunu, gücünü, hüquqlarını və emosional dünyasını xatırladan xüsusi bir gündür. Psixoloji baxımdan isə bu gün qadının öz dəyərini yenidən düşünməsi, özünə qayğı göstərməsi və daxili balansını bərpa etməsi üçün bir fürsətdir. Qadın həyatın bir çox rolunu eyni anda daşıyır: ana, həyat yoldaşı, qız övladı, işçi, rəhbər və dost. Bu rollar qadının həyatına mənalı rəng qatdığı kimi, bəzən emosional yük də yarada bilir. Psixologiyada buna “rol yüklənməsi” deyilir. Rol yüklənməsi qadının öz ehtiyaclarını ikinci plana atmasına səbəb ola bilər. Bu səbəbdən qadının yalnız başqalarına deyil, özünə də diqqət göstərməsi vacibdir. Özünə qayğı qadının psixoloji sağlamlığının əsas şərtlərindən biridir. Cəmiyyət bəzən qadınlardan “hər şeyi bacaran ideal insan” olmağı gözləyir. Halbuki psixoloji sağlamlıq üçün ən vacib olan şey mükəmməl olmaq deyil, real və balanslı olmaqdır.  Qadının psixoloji rifahının əsas sütunlarından biri özünə dəyər hissidir. Özünü dəyərli hiss edən qadın daha sağlam münasibətlər qurur, sərhədlərini qoruyur, qərarlarında daha inamlı olur və emosional baxımdan daha balanslı olur. Bu günün ən vacib mesajlarından biri qadınların özlərini qiymətləndirməsi və özlərinə qarşı daha mərhəmətli olmasıdır. Qadınlar həyatın davamlılığını, qayğını və gücü simvolizə edir. Onların psixoloji sağlamlığı isə yalnız fərdi deyil, həm də ailə və cəmiyyət sağlamlığı üçün vacibdir. Bu səbəbdən Beynəlxalq Qadınlar Günü qadınların yalnız təbrik olunduğu deyil, dəyərinin, gücünün və daxili dünyasının hörmətlə qarşılandığı bir gün kimi qeyd olunmalıdır. 

 

Əziz xanımlar,

 

Sizi 8 Mart Beynəlxalq Qadınlar Günü münasibətilə səmimi qəlbdən təbrik edir, bu xüsusi gündə hər birinizə öz dəyərinizi hiss etməyi, daxili gücünüzü qorumağı və xoşbəxtliyə layiq olduğunuzu unutmamağı arzulayıram. Qoy ildə bir gün yox, hər gününüz bayram olsun.

 

Nuranə Şahin

Azərbaycan Turizm və Menecment Universitetinin psixoloqu