Ultra yüksək tutumlu şəbəkələrlə bağlı qanun layihəsi hazırlanıb

Azərbaycanda ultra yüksək tutumlu şəbəkələrin yaradılmasının və genişləndirilməsinin asanlaşdırılması və təşviq edilməsi üzrə qanun lahiyəsi hazırlanıb.

Bu barədə Moderator.az-a İnformasiya Kommunikasiya Texnologiyaları Agentliyindən (İKTA) bildirilib.

Belə ki, “Dünya Bankı Qrupunun “Business Ready” hesabatının “Kommunal xidmətlər (internet)” indikatoru ilə bağlı müvafiq sahədə təkmilləşdirmələrin və kommunikasiyanın həyata keçirilməsinə dair 2025-ci il üzrə Yol Xəritəsi”nin 1.1.3-cü yarımbəndinə əsasən, fiziki infrastruktura malik telekommunikasiya, kommunal və digər xidmət operatorlarının fiziki infrastrukturlarından birgə istifadənin tənzimlənməsi, habelə dövlət mülkiyyətində olan infrastruktur obyektlərinə bərabər girişin təmin edilməsi ilə bağlı hüquqi çərçivənin formalaşdırılması və normativ hüquqi akt layihələrinin hazırlanaraq aidiyyəti üzrə təqdim edilməsi, “kommunal xidmətlərə qoşulma üzrə normativ hüquqi baza” alt komponenti üzrə görüləcək tədbir kimi müəyyən olunub. Bu istiqamətdə Agentlik tərəfindən Qanun layihəsi hazırlanıb və aidiyyəti üzrə təqdim edilib.

Layihənin əsas məqsədi, mövcud fiziki infrastrukturdan birgə istifadəni təşviq etməklə və yeni fiziki infrastrukturun daha səmərəli şəkildə yaradılmasına şərait yaratmaqla ultra yüksək tutumlu şəbəkələrin yaradılmasının və genişləndirilməsinin asanlaşdırılması və təşviq edilməsini, inzibati prosesləri sadələşdirilməsi və bu proseslərin rəqəmsallaşdırılmasından ibarətdir. Bu çərçivə, rəqəmsal texnologiyaların tətbiqi imkanlarının genişləndirilməsi üçün normativ hüquqi bazanın inkişaf etdirilməsi, rəqabətədavamlı və inklüziv rəqəmsal iqtisadiyyatın təşviq edilməsi, həmçinin, 5G texnologiyası da daxil olmaqla yüksəksürətli mobil internet xidmətlərinin əhatəsini artırmaqla hər regionda yüksək keyfiyyətli rəqəmsallaşmağa nail olmaq məqsədini daşıyır.