Azərbaycanlılar 35 saat Ermənistanda nələrdən danışdılar?

Bizi sosial şəbəkələrdən izləyin:

Xəbər verdiyimiz kimi, Azərbaycan vətəndaş cəmiyyətinin nümayəndələri quru sərhədinin delimitasiya olunmuş hissəsi vasitəsilə Ermənistana gediblər. “Sülh Körpüsü” təşəbbüsü çərçivəsində 13-14 fevral tarixlərində İrəvanda Ermənistan və Azərbaycan vətəndaş cəmiyyəti nümayəndələri arasında ikitərəfli dəyirmi masa görüşü keçirilib.

“Sülh Körpüsü” təşəbbüsünün əsas iştirakçılarından əlavə, dəyirmi masada hər iki tərəfdən daha geniş iştirakçı qrupları da iştirak ediblər. Bu dəfə hər iki tərəfdən 5 təşəbbüs üzvünə əlavə olaraq, iştirakçıların sayı artırılıb və ümumi say 39-a çatıb.

Görüşün iştirakçısı - Cənubi Qafqaz Tədqiqatlar Mərkəzinin (CQTM) direktoru Fərhad Məmmədov sosial media heabında bildirib ki, Azərbaycan nümayəndə heyəti Ermənistanda təxminən 35 saat keçirib. Bu müddətdə hoteldə dörd saatlıq transfer, dörd müzakirə sessiyası, rəsmi şəxslərlə iki görüş, mətbuat konfransı və davam edən qeyri-rəsmi dialoq olub:

“İşçi dillər ingilis və rus dilləri idi. Ermənistan mediası üçün keçirilən mətbuat konfransında erməni həmkarlar erməni dilində, azərbaycanlı həmkarlar isə rus dilində çıxış etdilər, çünki Azərbaycan dilindən tərcümə yox idi. Onlar proqramdakı mövzuları və cəmiyyətlərimizi narahat edən məsələləri müzakirə etdilər, sülh gündəliyinə yanaşmaları, maneələri və çətinlikləri, eləcə də gələcək fəaliyyətləri izah etdilər”.

Fərhad Məmmədov qeyd edib ki, görüşdə həm dialoq platformalarında təcrübəli mütəxəssislər, həm də ilk dəfə iştirak edən iştirakçılar iştirak ediblər. Nailiyyətlər, qarşılıqlı gözləntilər, çətinliklər və fikir ayrılıqları barədə səmimi dialoq aparılıb:

“Bu gün demək olar ki, Azərbaycan və Ermənistan cəmiyyətlərinin təhlükəsizliyin təmin edilməsi, müstəqilliyin və suverenliyin artırılması və sülh gündəliyindən faydalanmaq baxımından gözləntiləri üst-üstə düşür. Sülh gündəliyi artıq bir çox nailiyyətlər əldə edib, lakin gözləntilər artır, qeyri-müəyyənliklər davam edir və bir çox problem təbəqələri qalmaqdadır.

“Sülh Körpüsü” təşəbbüsü ikitərəfli dialoqu rəsmiləşdirmək cəhdi, dialoqun mümkün olduğunun və müəyyən bir məqamda hətta institusional formalar ala biləcəyinin nümayişidir. İş iki istiqamətdə davam edir: öz cəmiyyəti ilə ünsiyyət və birgə fəaliyyət”.

Qeyd edək ki, Azərbaycan nümayəndə heyətinə Fərhad Məmmədov, Rusif Hüseynov, Kəmalə Məmmədova, Ramil İsgəndərli, Fuad Abdullayev, Könül Bədəlova, Zaur Şiriyev, Murad Muradov, Aytən Qəhrəman, Rauf Ağəmirzəyev, Gülbəniz Qənbərova, Nəzrin Əliyeva, Eldar Həmzəli, Sənan Rzayev, Gülşən Axundova, Emin Əliyev, Orxan Babayev, İlya Hüseynov, Fuad Ağamalıyev daxildir.