6000 manatlıq müavinət niyə verilmir? – Mexanizm açıqlandı

Valideyn himayəsindən məhrum olmuş şəxslərin ilk dəfə işə düzəldikdə aldıqları birdəfəlik müavinətin ödənilməsində gecikmələr, prosedur qeyri-müəyyənliyi və geriyə dönük müraciətlərlə bağlı çətinliklər son günlər ciddi narazılıq yaradıb. Bir çox vətəndaş işə başladığı halda müavinəti ala bilmədiyini və ya hüququndan xəbərsiz olduğu üçün illər sonra müraciət edərkən ödənişdən kənarda qaldığını bildirir. Məsələ ilə bağlı NOCOMMENT.az Dövlət Sosial Müdafiə Fonduna sorğu ünvanlayıb və qurum rəsmi açıqlama verib.

Açıqlamada qeyd olunub ki, “Valideynlərini itirmiş və valideyn himayəsindən məhrum olmuş uşaqların sosial müdafiəsi haqqında” Qanuna əsasən bu kateqoriyadan olan şəxslərə ilk dəfə işə düzəldikdə 6000 manat məbləğində birdəfəlik müavinət ödənilir. Müavinət 18 yaşınadək olanlara, həmçinin 18–23 yaşlarında əyani təhsildə olan şəxslərə şamil edilir.

Qurum bildirir ki, ödəniş üçün iş yerindən arayış tələb olunmur. Şəxsin ilk dəfə işə qəbul tarixi Əmək və Əhalinin Sosial Müdafiəsi Nazirliyinin “Əmək və məşğulluq” altsistemindən götürülür. Sisteməqədərki tarixlər üzrə məlumatlar əmək kitabçası ilə təsdiqlənir.

Açıqlamada qeyd olunur ki, 01.01.2022-ci ilədək müavinətin təyinatı Elm və Təhsil Nazirliyi tərəfindən həyata keçirilib, həmin tarixdən sonra prosesin icrası tam olaraq DSMF-yə həvalə olunub.

Fond həmçinin bildirib ki, müavinətin geriyə dönük ödənilməsinə dair hər hansı məhdudiyyət yoxdur.

Hüquq 01.01.2022-dən sonra yaranıbsa, DSMF birbaşa təyinat aparır. Hüquq 2022-ci ildən əvvələ aiddirsə, şəxsin əvvəl müavinəti alıb-almadığını müəyyən etmək üçün Elm və Təhsil Nazirliyinə sorğu göndərilir və ödəniş edilməyibsə, vətəndaşa müavinət tam şəkildə ödənilir.

Tarixlər üzrə ödəniş məbləğləri isə belədir:

20.12.2024-dək hüququ yaranan şəxslərə respublika üzrə orta aylıq əmək haqqının 5 misli və əlavə 265 manat kompensasiya, 20.12.2024-dən sonra hüququ yarananlara isə 6000 manat müavinət verilir.

DSMF əlavə edib ki, vətəndaşlar müavinət üçün istənilən DOST mərkəzinə və ya Fondun yerli qurumlarına müraciət edə bilərlər və proses tam elektron sistem üzərindən aparılır.