"İsveç film günləri"-nə start verilir

Bizi sosial şəbəkələrdən izləyin:

Moderator.az xəbər verir ki, Azərbaycan Kinematoqrafçılar İttifaqının İsveç səfirliyi ilə əməkdaşlığı çərçivəsində bu ilin oktyabrında “İsveç film günləri” təşkil olunacaq.7-14-21-28 oktyabr tarixlərində baş tutacaq nümayişlərdə 4 bədii film nümayiş olunacaq.

Rejissor Frida Kempfin “İsveç torpedosu” (2024) tammetrajlı bədii filmi 1939-cu ilin yayında, İkinci Dünya müharibəsi ərəfəsində, 30 yaşlı tənha ana Salli Bauerin oğlunu qorumaq üçün La-Manş boğazını üzərək keçməsindən bəhs edir.

Rejissor Per Flünün “Hammarşöld” (2023) tammetrajlı bədii filmi 1961-ci ildə Soyuq Müharibə dövründə, İsveçli diplomat və iqtisadçı Daq Hammarşöldün həyatından, onun xalqlara verdiyi azadlıqdan, humanizmindən və bu yolda həyatını qurban verməsindən bəhs edir. O, BMT qoşunlarının ilk dəfə müharibə əməliyyatına rəhbərlik edir, düşmənləri ilə atəşkəs danışıqları aparmaq üçün riskli addımlar atır.

Rejissor Viktor Danelin “UFO İsveç” (2022) tammetrajlı bədii filmi İsveç assosiasiyasında baş vermiş fövqəltəbii hadisələrdən bəhs edir. Elmi-fantastik janrda olan filmdə, yeniyetmə üsyançı Denisenin atasını axtarmasından, qanunun sərhədlərini aşan və izah olunmayan hadisələrlə dolu riskli macərasından bəhs edir.

Rejissor Yens Syöqrenin “Mən Zlatanam” (2021) tammetrajlı bədii filmi Balkan mühacirlərin ailəsində doğulan məşhur futbolçu Zlatanın qeyri-adi istedadı, ailəsi, çətin həyatı və bütün bunlara rəğmən onun nüfuzlu klublarda çıxış edərək beynəlxalq futbolun zirvəsinə yüksəlməsindən bəhs edir.

Filmlər “Azərbaycan” CineMasterkard-da orijinal dildə, azərbaycanca altyazılarla nümayiş olunacaq.Hər bir nümayiş haqda əlavə və ətraflı məlumat veriləcək.